Il pli cuntent sajan els da finalmain puspè ina gia avair battì ils vischins e rivals da Schluein Glion, uschia il tenor dals Lumnezians. Ils davos onns n’era quai quasi mai grategià. Grazia al 1:0 avant il fans da chasa a Vella ha Lumnezia, il pli davos mument, er pudì far il pass a la testa da la tabella, munta ch’ils Lumnezians giogan la proxima stagiun puspè en 3. liga.
Ina victoria speziala èsi principal per il trenader da Lumnezia, Giacun Vinzens. El ha trenà e lavurà plirs decennis a Schluein – ed i regia anc adina ina tscherta rivalitad. Ils gieus tranter quellas duas equipas sajan simplamain adina spezials, uschia Vinzens.
I na vegnia betg ad esser ina simpla stagiun 2021/22, er perquai ch’els hajan adina puspè da cumbatter cun la mancanza da giugaders, uschia il president dal CB Lumnezia Silvan Caduff. La finamira saja dentant che l’equipa haja plaschair da dar ballape, e sch’i tanschia da restar en 3. liga tant meglier.
