Siglir tar il cuntegn

Header

Differents maletgs dal ballape regiunal
Legenda: Questa fin d'emna cumenzan ils campiunadis en las ligas regiunalas. RTR
cuntegn

Ballape regiunal Finalmain vai puspè liber

Suenter ina lunga pausa pervia dal coronavirus cumenzan puspè ils campiunadis en las ligas da ballape regiunalas. RTR dat ina survista tge che spetga da la 2. liga interregiunala fin la 4. liga.

2. liga interregiunala

La meglra equipa grischuna, Cuira 97 era en furma avant il coronavirus. Els eran sin buna via da far il pass en 1. liga. Cunquai che la stagiun passada è dentant vegnida annullada, dat Cuira er quest onn en 2. liga interregiunala.

En l'equipa hai dà pulitas midadas questa stad. Blers giugadurs da tschep han bandunà l'equipa. 13 giugaders han ils responsabels dentant er engaschà da nov. Uschia dumbra il cader da Cuira 97 uss per exempel tschintg Sursilvans. Carlo Bearth (chapitani) e Rafael Deplazes èn vinavant pitgas fermas da l'equipa. Nov part da l'equipa da la chapitala grischuna fan Lars Caduff, Marino Cavegn (omadus nov da Schluein Glion) ed er Fabrizio Cavegn (nov dal Team Südostschweiz U18).

Ins astga esser spannegià sche Cuira 97 vegn da confermar las bunas prestaziuns da la stagiun passada. Pervi da las bleras midadas en l'equipa èsi dentant grev da far prognosas.

2. liga regiunala

Sin la US Schluein Glion spetga ina greva stagiun. Il club ha gì fadia da metter ensemen in'equipa ch'è abla da restar en la 2. liga regiunala. Blers giugaders da tschep han numnadamain bandunà l'equipa ils ultims mais. Remplazzà quels han ins spezialmain cun agens juniors. Plinavant èn trais giugaders vegnì da Cuira en la Foppa. Quai era grazia a Mate Lekishvili ch'è dapi il zercladur il nov scheftrenader. Avant trenava el la segunda equipa da Cuira en 3. liga. Sin Lekishvili spetga ina gronda sfida da tegnair Schluein Glion en la 2. liga regiunala.

3. liga

Sis equipas grischunas dattan questa stagiun en terza liga (Domat, Tusaun-Cazas, Trun/Rabius, Landquart, Puschlav e Cuira 2). Il pli bler dastgan ins segir spetgar da Domat che ha la finamira da far il pass en 2. liga. Interessant vegn er d'observar co il CB Trun/Rabius profitescha da la collavuraziun cun Danis-Tavanasa. L'equipa da la Cadi ha pudì rinforzar l'equipa cun ils ferms giugaders dals vischins per tegnair pitg en 3. liga.

4. liga

Ils favurits en 4. liga èn ils medems sco gia l'onn passà. Il CB Lumnezia, il CB Schlarigna e Razén èn probabel las equipas che vegnan a cumbatter per plazza 1.

Era en acziun en 4. liga èn tranter auter il CB Surses ch'è adina bun per ina u l'autra surpraisa, e la US Danis-Tavanasa che cumenza suenter la collavuraziun cun Trun/Rabius cun in fetg giuven cader il campiunadi.

Artitgels legids il pli savens

Scrollar a sanestra Scrollar a dretga