Il Giapun ha mussà al Big Air Cuira ch'ella è la naziun numer in da snowboard freestyle. Quai era tar cundiziuns d'aura difficilas sco la sonda saira, cun blera plievgia.
Tar las dunnas mussa Kokomo Murase en il final da las otg meglras atletas dus sigls fantastics, e gudogna cun 179.25 puncts. Ella gudogna avant la collega d'equipa Reira Iwabuchi. Mia Brookes da la Gronda Britannia cumplettescha il podest sco terza.
Anc pli gronda è la dominanza giapunaisa tar ils umens. Hiroto Ogiwara gudagna cun 171.50 puncts, avant ses cumpatriots Kira Kimura e Takeru Otsuka. Svizzers n'èn tar las dunnas sco er tar ils umens betg stads da la partida en il final. Tuts avevan mancà la qualificaziun.
Cuntrari a las atletas ed atlets da freeski il venderdi saira – han ils freestylers sin l'aissa pia pudì cumenzar la nova stagiun cun in vair plum al Big Air Cuira.
Tar il freeski quinta la qualificaziun sco rangaziun
Damai ch'ils finals da freeski al Big Air Cuira èn vegnids dads giu ord motivs da malaura, valan ils resultats ord la qualificaziun.
Tar las dunnas gudogna uschia la svizra Mathilde Gremaud cun 95,50 puncts. La campiunessa olimpica da Beijing (Slopestyle) gudagna avant la franzosa Tess Ledeux. Cun Sarah Hoeflin cumplettescha sco terza in'ulteriura svizra il podest. La grischuna Giulia Tanno vegn settavla.
Tar ils umens datti pervia da l'annullaziun dals finals in victur da surpraisa. La victoria va al canadais Dylan Deschamps. Per il giuven da 20 onns èsi pir stà la terza gida ch'el è stà da la partida ad ina cursa da la cuppa mundiala. Il podest vegn cumplettaus dal giuven austriac Daniel Bacher (18) e dal victur da l'onn passà, Birk Ruud da la Norvegia.
Il matadur local Andri Ragettli sto uschia vinavant spetgar sin ina plazza da podest al Big Air Cuira. Suenter ch'el era vegnì l'onn passà quart, tanschi quest'onn mo per plazza 10.
Sonda spetgan alura las snowboardistas ed ils snowboardists sin lur schanza – almain sche l'aura na fa nagin stritg atras ils quints dals organisaturs ed ils atlets e las atletas.
