Il meglier Svizzer a la cursa da «Bike Revolution» a Cuira, la segunda da trais cursas da questa seria ch'è vegnida iniziada quest onn da Nino Schurter ensemen cun l'anteriur profi Ralph Näf, è stà Thomas Litscher sco terz. El ha la finala pers il sprint final encunter il duo franzos cun Jordan Sarrou e Titouan Carod. Persvadì han dentant er ils dus indigens Nino Schurter e Vital Albin ch'èn stads durant l'entira cursa en la gruppa da testa. Pir sin ils davos meters han els stuì laschar scappar la ferma concurrenza franzosa.
Rangaziun dals umens d'elita:
- Jordan Sarrou (FRA) 1:22:26
- Titouan Carod (FRA) +0:00
- Thomas Litscher (SUI) +0:01
- Nino Schurter (SUI) +0:17
- Vital Albin (SUI) +0:20
Alessandra Keller ina classa per sasezza
Ina victoria svizra hai dà tar las dunnas d'elita. Alessandra Keller ha triumfà a moda suverana cun in avantatg dad ina minuta e dapli sin la concurrenza. Keller, la collega d'equipa da Vital Albin e Mathias Flückiger che n'è betg stà a la partenza, ha pudì sa distanziar gia durant l'emprima runda da tut il rest.
Tar las junioras sut 19 onns han Anina Hutter da Trimmis e Lorena Cadalbert da Cuira pudì festivar ina victoria dubla grischuna. Sin las emprimas rundas èn ellas stadas communablamain a la testa. Silsuenter ha Hutter anc ina giada augmentà il tempo e la finala triumfà cun in avantatg da 1:26 minutas sin Cadalbert. Per las duas giuvnas da 17 onns in grond success a questa cursa avant ils fans da chasa. La cursa dals juniors sut 19 onns ha gudagnà Ilian Alexandre Barhoumi dal chantun Friburg.
Rangaziun da las dunnas d'elita:
- Alessandra Keller (SUI) 1:24:49
- Anne Terpstra (NED) +1:00
- Sina Frei (SUI) +1:35
- Ronja Blöchlinger (SUI) +1:56
- Ramona Forchini (SUI) + 2:18
In success cumplain
Durant trais dis è la citad da Cuira stada il Mecca dal sport da mountainbike. Il city event da la seria da cursas «Bike Revolution» ha carmalà, dasper blers curriders d'elita da la cuppa mundiala, er fullas da glieud, quai principal a l'ur da la cursa en la citad veglia da Cuira. Plinavant hai er dà cursas ed occurrenzas per uffants, turas da mountainbike organisadas per in e scadin cun porscher là posts cun products e spezialitads localas – ed in areal da festa cun stans ed in'exposiziun da velos entamez la chapitala grischuna.
