Siglir tar il cuntegn

Header

cuntegn

«Bike Revolution» Cursa da chasa per Nino Schurter

La fin d’emna stat a Cuira sin il program il segund event da la nova seria da cursas da mountainbike «Bike Revolution». A la partenza va er Nino Schurter ch’ha lantschà questa seria da cursas ensemen cun l’anteriur profi Ralph Näf. Premiera ha il «Bike Revolution» gì la fin mars en il Tessin.

audio
Iniziant Ralph Näf davart il «Bike Revolution»
aus Actualitad vom 19.04.2022.
abspielen. Laufzeit 3 minutas 43 Sekunden.

Schurter cunter ils Franzos

A Cuira frunta Nino Schurter sin concurrenza ferma. Tranter auter cumbatta il matador local cunter il trio franzos cun Jordan Sarrou, il campiun mundial dal 2020, Titouan Carod e Maxime Marotte ch’ha pers be piz a cup il sprint final cunter Schurter tar l’emprima cursa da la cuppa mundiala en questa stagiun a Petropolis en la Brasilia. Grazia a questa victoria ha Schurter egualisà il record dal Franzos Julien Absalon cun 33 victorias da la cuppa mundiala.

Er Vital Albin a la partenza 

Ord vista svizra partan tranter auter er Lars Forster, il campiun d’Europa e collega d’equipa da Nino Schurter, Filippo Colombo ch’ha gudagnà l’emprima cursa da «Bike Revolution» tar el a chasa a Monte Tamaro, Thomas Litscher e Vital Albin, il segund matador local. Betg a la partenza è percunter Mathias Flückiger che vul sa concentrar sin il Tour de Romandie che cumenza mardi, ils 26 d’avrigl. Er betg a la partenza è la campiunessa olimpica Jolanda Neff. Percunter partan tar las dunnas Sina Frei, Linda Indergand ed Alessandra Keller.

La cursa cumenza entamez la citad da Cuira e maina tras la citad veglia en il guaud al pe dal Mittenberg. Sin ils trails da chasa da Nino Schurter vai puspè enavos en la citad, uschia ch’ils aspectaturs pon persequitar fitg datiers ils stars da mountainbike. Igl è ina maschaida tranter in City Event ed ina cursa usitada ora en il guaud.

Festa da mountainbike

Dasper ils curriders d’elita partan la dumengia, il 24 d’avrigl, er las junioras ed ils juniors. Liber cun cursas vai però gia la sonda cun diversas cursas d’uffants. Plinavant pon in e scadin er sa participar a trais differentas turas en la regiun da Cuira nua ch’i vegn mintgamai er purschì divers posts cun products e spezialitads localas.

Il «Bike Revolution» n’è uschia betg ina cursa da mountainbike, mabain in event da mountainbike per tut ils fans da questa scena. En la citad datti er in areal da festa nua che Nino Schurter vegn tranter auter onurà il venderdi saira per tut sias prestaziuns e per quai ch’el ha fatg per il sport da mountainbike en Svizra.

Actualitad 12:00

Artitgels legids il pli savens

Scrollar a sanestra Scrollar a dretga