Sulet il CB Trun/Rabius è vegnì da tegnair la liga. L’equipa da la Cadi dat er la proxima stagiun, quai gia per la quarta giada en roda, en la 3. liga regiunala. Trun/Rabius ha terminà il campiunadi sin il 7avel plaz da la tabella. I fiss dentant anc stà pussibel dapli per l’equipa ch’è vegnida trenada per la davosa giada da Donat Albin e Philippe Vincenz.
Tabella 3. liga regiunala
Trais da quatter equipas relegadas
Auter che Trun/Rabius n’èn ils Surmirans ed ils Lumnezians betg mitschads da la relegaziun. Omaduas equipas han terminà il campiunadi sut il stritg. Per il CB Surses è l’aventura 3. liga pia gia a fin suenter ina stagiun. Il CB Lumnezia ha gia baud stuì vesair en ch’i na tanscha betg da restar en la 3. liga. Lumnezia ha numnadamain gudagnà be 2 da 22 gieus da campiunadi.
Tabella 2. liga regiunala
Ina frida ha er l’US Schluein Glion stuì magunar. L’equipa da la Foppa sto suenter trais stagiuns puspè turnar en ina liga pli bassa. Cun quest cader e cun questa infrastructura è la finamira da tant pli spert puspè turnar enavos en la 2. liga.
