Suenter 16 rundas n'è la promoziun en terza liga betg pli da prender al CB Lumnezia. Suenter il 2:1 cunter il CB Surses è l'avantatg sin la concurrenza grond avunda per festivar ch'i va ensi. Uschia turnan ils Lumnezians suenter trais stagiuns puspè en terza liga.
Per l'equipa dal trenader Marco Blumenthal n'è dentant betg tut ì tenor plan. Surtut betg en l'emprima mesadad nua che ses giugaders han fatg insaquants sbagls. Il CB Surses ha agì curaschus e curt avant pausa ha il capitani Giatgen Mitgel Bellini marcà l'emprim gol en quest duel interrumantsch. Cun il resultat dad 1:0 per ils Surmirans èsi ì en la pausa. Suenter il te, en la 53avla minuta, po Andriu Alig egualisar per ils Lumnezians. Quest pari avess tanschì al CB Lumnezia per la promoziun. Tschintg minutas avant la fin fa Yanick Demont tut cler cun marcar il 2:1.
Duas rundas avant la fin han ils Lumnezians uss 43 puncts. 10 dapli ch'il CB Surses ch'aveva cumenzà la runda da primavaira cun medem blers puncts sco il CB Lumnezia.
L'ultima giada ch'il CB Lumnezia ha giugà en terza liga è stà la stagiun 2021/2022. Ma a la fin da questa èsi puspè ì engiu en la quarta. Dumagnar la promoziun, restar ina stagiun en terza e lura puspè vegnir relegads è era gia capità al club da la Lumnezia la stagiun 2018/19. Ils giugadurs èn conscients ch'i vegn era questa giada grev ed in dir cumbat encunter engiu. Ma l'equipa, era sche dentant pulit veglia, saja questa giada pli madira. Il principal saja dentant da vinavant avair plaschair da giugar ballape e da mantener il bun spiert d'equipa e lura guardar tge che capita.
Il plan dal CB Surses era in auter
Ils ballapedists dal CB Surses avevan definitiv s'imaginà in pau auter la runda da primavaira en quarta liga. Vulevan star fin la fin en il cumbat per ir si en terza. Ina missiun realistica suenter la buna runda d'atun cura ch'els èn ids sco segunds da gruppa e cun tuttina blers puncts sco ils leaders da la Lumnezia en la pausa d'enviern. Però trais terradas gia avant il derbi interrumantsch encunter lur rivals gia quasi eterns en quarta liga en il cumbat da promoziun, èn stadas massa bleras.
Definitiv stuì satrar la missiun promoziun han ils Surseters avant 15 dis, cura ch'els han pers in pau disgrazià il gieu encunter Valposchiavo Calcio, ils ultims en la tabella. Per las duas terradas al cumenzament da la runda da primavaira datti raschuns. Il goli ha bandunà il CB Surses e l'equipa ha stuì improvisar e chattar ina alternativa cun metter in giugader en gol, tge ch'ha duvrà in pau temp da puspè fitgà pe.