Siglir tar il cuntegn

Header

video
Campiunadi mundial da biatlon a Lai sveglia grondas emoziuns.
Or da Telesguard dals 17.11.2020.
laschar ir
cuntegn

Campiunadi mundial Lai 2025 Biatletas e biatlets grischuns èn fieu e flomma

En bun tschintg onns vegn il campiunadi mundial da biatlon a Lai. Quai ha decidì la sonda passada l’Uniun internaziunala da biatlon. Per Lai e per l’entira scena da biatlon en Svizra è quai in success istoric.

Grond plaschair che la candidatura da Swiss Ski ensemen cun la Biatlon Arena Lai ha persvadì la IBU han principalmain ils protagonists, las biatletas ed ils biatlets grischuns.

Gronda motivaziun per ils giuvens

Tschintg onns han biatletas e biatlets uss peda da sa preparar sin quest punct culminant. E per bain inqual vegn quest campiunadi mundial a Lai gist en il dretg mument, uschia forsa er per Aita Gasparin (26) che pudess esser lura sin il zenit da sia carriera. La giuvna da las soras Gasparin fiss lura 31, ina vegliadetgna ideala per cumbatter per ina medaglia. Quai fiss sa chapescha in siemi, sch’i gartegiass da far il pass sin il podest a quest campiunadi mundial quasi avant ses isch-chasa, uschia Aita Gasparin. Er per Elisa Gasparin (28), per Irene Cadurisch (29) u per Serafin Wiestner (30 onns) na fissi anc betg memia tard per far furora al campiunadi mundial dal 2025 a Lai.

Betg realistic

I dat dentant er atletas ed atlets che na vegnan betg pli ad esser activs en tschintg onns. Oravant tut per Selina Gasparin (36) vegn quest campiunadi mundial memia tard. La pioniera dal biatlon en Svizra sa legra dentant fitg che la Svizra è uss finalmain daventada ina naziun da biatlon. Il svilup dals davos 15 onns, dapi ch'ella haja dà ses debüt en la cuppa mundiala, saja simplamain enorm, uschia Selina Gasparin. Ella vegnia ad esser da la partida a quest campiunadi mundial a Lai en in’autra funcziun. Ed ella speria da pudair sa gidar e sustegnair in e l’auter cun sia gronda experientscha.

Sch’i dess ina categoria sur 40, lura fiss jau da la partida.
Autur: Selina Gasparinbiatleta cader naziunal

En ina sumeglianta situaziun sco Selina Gasparin è er Eligius Tambornino (34). Il biatlet da Trun avess lura 38 onns. Uschia na saja quai betg ina finamira realistica, di Tambornino. Ma per il biatlon en Svizra e per ils giuvens saja quai ina super chaussa. I vegnia er suenter blers buns giuvens ed el saja persvadì che bain inqual biatlet svizzer haja la schanza da cumbatter per ina medaglia al campiunadi mundial 2025 a Lai.

Actualitad 17:00

Artitgels legids il pli savens

Scrollar a sanestra Scrollar a dretga