Siglir tar il cuntegn

Header

video
Ursin Spescha davart la cursa da e-mountainbike
Or da RTR Social dals 08.10.2020.
laschar ir
cuntegn

Campiunadi mundial Leogang Ursin Spescha: «Disdescha il motor èsi finì»

Per la segunda giada suenter il 2019 èsi vegnì cumbattì ad in campiunadi mundial da mountainbike per medaglias en ina cursa cun velos a motor. Radund 50 atlets han cumbattì per quest titel, tranter els er Ursin Spescha da Sevgein ch’ha terminà la cursa sco 17avel.

Campiun mundial è daventà l’Englais Thomas Pidcock, er ina gronda figura en la scena da cross country. A la partenza è plinavant er stà la legenda franzosa Julien Absalon, il dubel campiun olimpic.

Ina coola cursa

La cursa dad e-mountainbike ch’ha cuzzà bun in’ura ha, malgrà l’agid dal motor, pretendì tut dals atlets. Per l’ina è il profil stà pretensius, per l’autra hai daratgà durant l’entira cursa. Per ina cursa cun e-mtb saja quai dentant stà cundiziuns idealas, uschia Ursin Spescha suenter sia premiera.

Differenza extrema

Cun u senza motor saja ina gronda differenza di Ursin Spescha. Ensi sajan ins pli spert, muntia dentant era ch'ins stoppia avair bain enta maun il velo, gist en las stortas andetgas. Engiu sentan ins la paisa, ed ina gia ch’il velo cumenza a ruschnar èsi pli grev da tegnair el en via. Il mountainbike cun motor paisa enturn 20 kilos ed uschia circa il dubel d’in mountainbike senza motor. Lura sto il motor funcziunar. Vess quel da disdir munta quai er la fin da la cursa.

Er sche blers miran anc cun egls critics vers las cursas dad e-mountainbike èn quellas pli probabel l’avegnir, quai manegia er Ursin Spescha. Er sch'il motor saja in agid, i saja per tuts tuttina. A la fin stettian er en questas cursas ils megliers sin il podest. Pia decidan la finala er qua la cundiziun e la tecnica.

Actualitad 17:00

Artitgels legids il pli savens

Scrollar a sanestra Scrollar a dretga