Actualmain giauda Dario Cologna il temp cun sia famiglia e ses pitschen figl. Dasperas è el vid far ponderaziuns concretas davart la carriera suenter la carriera. Quai ha Cologna ditg a la «Notg da sport grischuna» nua ch’el è stà envidà sco giast d’onur e nua ch’el ha er tegnì la laudatio per il victur e sportist da l’onn 2022, il skicrosser Alex Fiva.
La biografia duai cumparair l’atun
In ulteriur project da Dario Cologna per quest onn è ses cudesch nov, sia biografia che cumpara sco el di quest atun. En quest cudesch lascha Cologna anc ina giada reviver sia carriera, tuts ses success. I duai dentant dar in cudesch spezial, in cudesch che fetschia plaschair da leger cun bels maletgs. Er duain vegnir a pled en quest cudesch persunas ch'han accumpagnà el durant sia lunga carriera.
Ed er sche la carriera è a fin, Dario Cologna è anc adina top fit. El treneschia u fetschia, sche pussibel, anc oz mintga di sport, quai ord spir plaschair. E sco il Jauer ha tradì haja el er la finamira da parter en l’avegnir tranter auter al Maraton da skis engiadinais, quai dentant betg pli sco profi, mabain sco currider popular.
