Siglir tar il cuntegn

Header

video
Dario Cologna – Co èsi stà e co vai vinavant?
Or da RTR Social dals 28.03.2022.
laschar ir. Durada: 27 minutas 32 Secundas.
cuntegn

Dario Cologna di adia: «Las cursas e las emoziuns vegnan a mancar»

Il Jauer ha gudagnà tut quai ch'i dat da gudagnar en il sport da passlung. Quatter giadas è el vegnì campiun olimpic, quatter giadas ha el gudagnà il classament general ed ina giada è Dario Cologna er stà sisum il podest als campiunadis mundials. Cun l'atlet da 36 onns bandunà in dals pli gronds sportists svizzers da tut il temp la tribuna gronda.

Terminà la carriera sco i tutga per in grond campiun

En la davosa cursa hai anc ina giada dà aur per il Grischun. La cursa sur 50 kilometers a Zweisimmen en la Part Sura Bernaisa è stada fitg attractiva. Sin la davosa runda ha Dario Cologna pudì gudagnar in pèr meters distanza sin la concurrenza, ed ha fatg aur avant Toni Livers. Terz è daventà il biatlet Jeremy Finello. Cun Jonas Baumann vegn in ulteriur Grischun quart.

Nadine Fähndrich ha era mussà sur ils 30 kilometers sia classa e buna furma, e distanzià sias concurrentas per ina mesa minuta e dapli. Argient fa Anja Weber, e bronz va a l'Engiadinaisa Nadja Kälin. Giuliana Werro curra sin rang 4.

La passlunghista Nadine Fähndrich.
Legenda: La campiunessa svizra Nadine Fähndrich. Freshfocus

Las duas cursas da la sonda han era muntà da prender cumià, betg mo dal Jauer Dario Cologna. Era Jovian Hediger e Laurien van der Graaff han cun quest di terminà lur carriera da sport professiunal.

video
Laurien van der Graaff suenter sia davosa cursa
Or da Actualitad video dals 26.03.2022.
laschar ir. Durada: 32 Secundas.

Il skiatlon dal venderdi

Il Jauer Dario Cologna è era daventà campiun svizzer en il skiatlon (10 km classic e 10 km skating). Sin la davosa runda haja Cologna distanzià levet ses davos concurrents e gudagnà la cursa, sco Swiss-Ski ha communitgà. Argient ha fatg Jonas Baumann da Lon, e bronz ha gudagnà Beda Klee.

Tar la cursa da las dunnas è Nadine Fähndrich gia mitschada sin ils emprims 2,5 kilometers da sias concurrentas. La finala ha ella gudagnà cleramain il skiatlon, avant Anja Weber e Nadja Kälin.

RTR novitads 16:00

Artitgels legids il pli savens

Scrollar a sanestra Scrollar a dretga