Siglir tar il cuntegn

Header

cuntegn

CDH Engiadina resta en 2 liga Il CDH Engiadina è qualifitgà per ils playoffs

Dapi la victoria encunter Schaffusa èsi cler ch’il CDH Engiadina è da la partida en ils playoffs da la segunda liga da hockey. L’equipa da l’Engiadina Bassa ha uschia cuntanschi l’emprima finamira: ella resta vinavant en segunda liga.

Tar il CDH Engiadina haja dat en vista a questa stagiun da hockey en segunda liga in pèr midadas. Da nov vegn l’equipa trenada dad in quartet. Durant l’emna surpiglia l’anteriur trenader Benjamin Wunderer in trenament. Avant e durant las partidas è il trio Domenic Bott, Andri Riatsch e Leo Camichel responsabel per l’equipa. Quest novum ha procurà l’entschatta da la stagiun anc per in pau inquietezza. Las emprimas partidas dal nov champiunadi ha Engiadina pers.

audio
Andri Riatsch è cuntent cun la qualificaziun
ord Actualitad dals 14.01.2023. Maletg: RTR
laschar ir. Durada: 2 minutas 57 Secundas.

Cun il temp hai dentant cumenzà a funcziunar meglier. Uschia sa mova il CDH Engiadina actualmain sin ina vaira unda da success. Da las ultimas set partidas ha l’equipa da l’Engiadina Bassa gudagnà sis gieus.

Finamira: Gudagnar l’emprima runda da playoff

L’emprima finamira da questa stagiun ha il CDH Engiadina cuntanschì. La squadra na sto betg far quitads da la relegaziun. Il CDH Engiadina è da la partida en ils playoffs. Quels vegnan giugads en crusch tranter las duas gruppas da la segunda liga. En Engiadina Bassa sper’ins da gudagnar per l’emprima giada en l’istorgia ina seria da playoff – e da far uschia il pass en il quart final.

RTR actualitad 07:00

Artitgels legids il pli savens

Scrollar a sanestra Scrollar a dretga