Vital Albin ch’è gia sa participà per la terza giada ils davos onns a la cursa da chasa ha duvrà per ils bun 30 kilometers da Cuira ad Arosa cun radund 1'200 meters differenza d’autezza 1:04.58 uras. El ha uschia pers gnanc ina minuta sin ils pli sperts.
Victoria dubla tessinaisa
Procurà per la musica a l’ediziun da giubileum Cuira-Arosa han dus ciclists dal Club da velo Mendrisio. Alessandro Santatomita-Villa (1:04.01 uras) ha gudagnà il sprint final avant ses collega Mattias Nordal. Cumplettà il podest sco terz ha Hagos Berhe dal Club da velo Bürglen-Märwil.
Nina Zoller e Ginia Caluori sin il podest
Tar las dunnas han duas Grischunas cuntanschì in plaz da podest a la cursa Cuira-Arosa. Nina Zoller da Cuira è vegnida segunda (1:15.45 uras) e la giuvna Ginia Caluori da Panaduz è vegnida terza (1:16.32 uras). Ina classa per sa sezza è stada Petra Stiasny da Wädenswil. La giuvna da 20 onns ha pudì defender sia victoria da l’onn passà. Quest onn ha ella duvrà per il tschancun da 30 kilometers da Cuira ad Arosa 1:11.38 uras ed è uschia stada passa duas minutas pli sperta ch’il 2020.
Tut en tut èn stads a la partenza 222 ciclists e 23 ciclistas a questa ediziun da giubileum 40 onns classicher da velo Cuira-Arosa.
Heinz Frei cun il «handbike» ad Arosa
Dasper la cursa tradiziunala Cuira-Arosa ed il campiunadi svizzer da muntogna en la cursa cunter l’ura è er vegnì organisà ina cursa da «handbike» sur ina distanza da 20,5 kilometers. Ils participants han gì d’absolver 18 rundas enturn il lai d’Arosa. A la partenza èn però stads be 7 participants, tranter auter er Heinz Frei d’Oberbipp ch’ha terminà la cursa sin il terz plaz. Gudagnà la cursa da «handbike» ha Fabian Recher da Spiez avant Tobias Lötscher da Nottwil.
