L’equipa naziunala svizra persvada sin il glatsch, ed ils fans procuran per in’atmosfera che fa tut pel-giaglina. La festa da hockey en Svizra è propi lantschada, cunzunt en la citad da Turitg nua che la Svizra dat tut lur gieus da gruppa.
Ed enfin uss n’avess il campiunadi mundial betg pudì ir meglier ord vista svizra. L’equipa da Jan Cadieux ha gudagnà ils emprims tschintg gieus e cunzunt encunter l’Austria (9:0) ed encunter la Germania (6:1) procurà per ina gala.
Jau sun in fanaticher da hockey e giaud nundetg quest campiunadi mundial. Quai èn quest onn mias vacanzas.
Ils gieus da la naziunala svizra èn la Swiss Life Arena èn tuts vendids ora. La tribuna emplenida fin il davos plaz cun fans, la gronda part fans svizzers, quasi tuts en in tricot da la naziunala.
L’equipa po propi giugar davant ina paraid cotschna, davant ils fans da chasa che sustegnan l’equipa en mintga situaziun. Dentant er enturn il stadion, en la zona da fans ed en l’entira citad da Turitg regia gronda euforia e gronda festa da hockey.
Jau sun ferm persvadì che la Svizra gudogna quella giada aur. Quai sto tanscher quest onn.
La naziunala svizra è sin ina clara missiun – triumfar e festivar l’emprim titel da campiun mundial. E suenter avair gudagnà quatter giadas argient dapi il 2013, tranter auter er ils davos dus onns, para l’equipa uss dad esser madira per quest grond coup.
Ma la via è en lunga. En paucs dis cumenza, cun ils quartfinals, la fasa da K.o., ed uschia er il cumbat per las medaglias. Perder è lura scumandà, duai il siemi dal titel ir en vigur a quest campiunadi mundial da chasa.