L’equipa naziunala svizra ha lantschà cun success il campiunadi mundial da hockey en l’agen pajais. Ils Svizzers han gudagnà ils emprims trais gieus da gruppa ed uschia procurà per gronda festa e bleras emoziuns ils emprims dis. Sin il glatsch ha l’equipa da Jan Cadieux persvadì. Dentant er davos la banda, davos las culissas, en gardaroba, en las catacombas u en l’hotel para la chemia da constar. Quai mussan ils maletgs e filmins che la Federaziun da hockey svizra publitgescha di per di sin lur reits socialas.
Nus essan sco ina gronda famiglia. Nus vain legher in cun l’auter, igl è tut luc, nus n’avain naginas barrieras e l’atmosfera è grondiusa.
Per quest cuntegn è tranter auter er Andri Zala responsabel. L’Engiadinais lavura dapi intgins onns tar la SIHF sco digital content producer. Cun tut ses material da film vul el transportar las emoziuns da davos las culissas als fans svizzers e mussar tge che capita là nua che fans ad amis dal hockey n’han nagin access.
Andri Zala è gia stà a divers campiunadis mundials, ma questa giada saja tut pli grond e spezial. L’interess per la naziunala svizzer è bler pli grond. Uschia han Zala e ses team er dapli lavur e vulan er nizzegiar questa plattafurma per far ina buna reclama per il hockey svizzer. In campiunadi mundial a chasa n’hajan ins la finala betg mintga di, di l’Engiadinais da 35 onns.
