Las ballapedistas da Tusaun-Cazas (2. liga) gudognan il final da la Cuppa grischuna 2026 encunter il Team Surselva (3. liga) cun 2:0. Uschia turna il buccal, suenter in onn pausa, puspè enavos a Tusaun.
Per la 11avla giada va il titel da la Cuppa Grischuna a Tusaun-Cazas. Per la differenza ha finala Melina Baumberger procurà cun dus gols en l'emprima mesadad. Curt avant igl 1:0 per l'equipa da Tusaun en la 13avla minuta avessen las Sursilvanas dentant gì la gronda occasiun d'ir en avantatg entras in penalti. L'attatgadra Mara Blumenthal ha dentant mess il bal sper la petga vi. En la 29avla minuta ha Melina Baumberger fatg ses segund gol.
Nagin happy end per las Sursilvanas
En la segunda mesadad ha il Team Surselva, ch'è stà per l'emprima giada en il final, bain empruvà tut da crear acziuns offensivas, propi malsegir èsi dentant vegnì mo darar. Tut en tut èsi stà in final guliv, fetg cumbattì e fair, nua che spezialmain la rutina da l'equipa da Tusaun-Cazas e Melina Baumberger han fatg la differenza.
Il Team Surselva dastga dentant, malgrà la terrada, esser cuntent cun il final. La differenza da liga tranter las duas squadras n'è sur las 90 minutas strusch stada da vesair. I è stà in gieu che avess pudì cupitgar sin omaduas varts.
