L'um dal gieu è stà Danilo Lozza ch'ha realisà in hattrick per Domat suenter pausa. Tranter la 54avla e la 69avla minuta ha l'attatgader sajettà trais gols per Domat al 3:1, 4:2 e 5:2. Per Schluein Glion ha Lars Zala tuc duas giadas. Il davos gol al 3:5 ha el dentant sajettà pir en la 93 minuta. Gia da pausa manava Domat ordaifer en l'Arena Crap Gries cun 2:0.
Cunquai è Domat er vegnì da far revantscha per la terrada encunter Schluein Glion en il campiunadi. La fin d'emna passada avevan ils Sursilvans numnadamain battì Domat a chasa cun 5:2, er grazia a trais gols da Lars Caduff. En la tabella da la terza liga sa chatta l'USSI sin il terz plaz cun 10 puncts, Domat è sin il 7avel plaz cun 6 puncts, quai suenter ils emprims 5 gieus da campiunadi.
Il FC Domat è uschia il terz mezfinalist da la Cuppa grischuna. En il davos duel da quartfinal frunta il FC Landquart sin Cuira 97. Quest gieu tranter duas equipas da la 3. liga è ils 11 d'october a las 20:00 uras a Landquart.
Valposchiavo e Trun/Rabius en il mezfinal
Gievgia ils 21 da settember han ils favurits da Poschiavo battì lur concurrents da l'Engiadin'Ota cun 3:0. Il FC Schlarigna, che gioga en la quarta liga, n'ha betg propi gì ina schanza da chaschunar ina sensaziun cunter ils Puschlavins da la segunda liga. Suenter in mes'ura eran quels gia oravant cun 2:0 suenter gols dad Andrea Sanna e Mauro Crameri. Alekos Zugnoni ha lura finì il gieu cun il 3:0 duas minutas avant la fin.
Il Club da ballape Trun/Rabius è l'emprim mezfinalist da la Cuppa grischuna da ballape 2023/2024. L'equipa da la terza liga dal nov trenader Claudio Bundi ha gudagnà piz a cup encunter l'equipa da la 5avla liga, il FC Lusitanos de Samedan cun 2:1. Da pausa manavan ils Engiadinais anc surprendentamain cun 1:0. Curt suenter la pausa han ils dus frars Robin e Denis Monn pudì volver il resultat.
