L’US Schluein Glion ha cuntanschì sco emprima equipa il final da la Cuppa grischuna 2026. Ils Sursilvans e defensurs dal titel han gudagnà il mezfinal a chasa en l’Arena Crap Gries encunter Cuira 97, il victur dal 2024, cun 3:1. En il final frunta l’USSI sin il victur dal duel tranter il CB Schlarigna (4. liga) e Valposchiavo Calcio (2. liga). Quest segund mezfinal è fixà sin ils 15 d’avrigl.
Per Schluein Glion ha il mezfinal encunter Cuira, in duel tranter duas equipas da terza liga, cumenzà cun ina duscha freida. Gia en la 6avla minuta ha Davide Rosafio manà l’equipa da la chapitala grischuna cun 1:0 en avantatg. Be duas minutas pli tard han ils Sursilvans però pudì reagir ed egualisar al 1:1 entras Aron Büchler. En la 27avla minuta ha Lars Zala sajettà il 2:1 per il favurit ed en la 70avla minuta ha il capo-tiragols Lars Caduff decidì il gieu cun ses 3:1.
L’US Schluein Glion ha uschia la schanza da gudagnar per la terza giada il titel da la Cuppa grischuna ils davos onns. Il 2023 aveva l’USSI battì en il final Valposchiavo Calcio cun 3:1 e l’onn passà il CB Lumnezia cun 5:3 suenter la prolungaziun. Il final ha lieu la gievgia d’Ascensiun, ils 14 da matg, a Cuira.