Tar omadus giugaders restan las emoziuns tuttina sco avant auters gieus – in’autra agitaziun na saja betg avant il derby. Mintga partida cumenzia da nov ed il resultat dals duels passads na saja betg in avantatg, han manegià Jan Lony e Linard Schmidt.
Las schanzas d’omaduas squadras sajan tuttina grondas questa saira. Da quest avis è Linard Schmidt dal Cdh Engiadina. E Jan Lory dal EHC San Murezzan spetga ina partida fitg interessanta e fitg stretga, cun bleras emoziuns.
Las bunas olmas davos las culissas
Sin il glatsch procuran ils giugaders da hockey per la musica. Sper il glatsch, sin il banc da las equipas, èn las assistentas ed assistents quels che curran e fan. Els procuran per tut quai ch'ils giugaders dovran. Els fan pront ils tricots, ils sientamauns e lura er las differentas bavrondas e mangiativas. Assistentas ed assistents d’equipa mettan ad ir patins e chapellinas e sche necessari, san els era far l’emprim agid tar in accident.
Tut quai che capita davos las culissas fatg jau precis medem sco adina.
Ins senta ch'igl è «Derby-Time»
Il derby da hockey engiadinais è er per las assistentas e per ils assistents d’equipa dal Cdh Engiadina e dal EHC San Murezzan in gieu tut spezial. Curt avant la partida sentan er els ch'i va vers in gieu da grondas aspectativas. Tuttina emprovan els da restar calms e da far tut sco adina. Er els speran che lur equipa gudogna. Durant il gieu duai quai esser in duel per la curuna da hockey en Engiadina, suenter il duel dattan ins dentant puspè il maun.
I va per revantscha, dentant era per restar en segunda liga
Il derby da hockey engiadinais decida, tge equipa ch’è actual la meglra: Il Cdh Engiadina u l'EHC San Murezzan. L’emprim duel da la stagiun ha San Murezzan gudagnà. Uss vul Engiadina far revantscha.
Betg per l’emprima giada durant ils ultims onns vai per il Cdh Engiadina d'as salvar e da restar en segunda liga. L’equipa da Scuol è per regla l’equipa engiadinaisa pli flaivla en il campiunadi. Ed er en ils duels directs cunter l'EHC San Murezzan ha il Cdh Engiadina savens stuì ir sco squadra perdenta da la plazza da glatsch. Suenter la sconfitta l'october passà, vul il Cdh Engiadina puspè ina giada gudagnar il duel. Uschia sco l’atun da l’onn 2022, nua ch'il Cdh Engiadina ha gudagnà l’ultima giada il derby cunter ils rivals da San Murezzan.
Il derby engiadinais era pli baud ina «guerra», uss è quai ina battaglia.
Puspè ina giada temp per ina victoria
Durant l’emprim derby da la stagiun da l'october, n'ha il Cdh Engiadina fatg gnanc in gol. San Murezzan ha gudagnà cleramain cun 5:0. Gist in di avant quest derby aveva il Cdh Engiadina dentant relaschà il trenader e Benny Wunderer, l’anteriur trenader da l'emprima squadra e trenader da juniors, aveva surpiglià l’equipa. Questa malsegirtad è stada visibla sin il glatsch. Uss, dus mais e mez pli tard, è quest schoc digerì e l’equipa è puspè pli stabila cun il trenader Benny Wunderer. Ad el esi reussì da dar structura e segirtad a l’equipa ed il Cdh Engiadina è vegnì adina meglier en furma. L’equipa ed il trenader èn puspè sa chattads e la squadra è vegnida pli cumpetitiva. I resta dentant la finamira principala: salvar l'appartegnientscha en la segunda liga.
Il derby cunter San Murezzan è insatge grond. Nus vulain gudagnar.
Il favurit vul gudagnar e betg be fidar a la statistica
L'EHC San Murezzan vul era gudagnar il segund derby da la stagiun encunter il Cdh Engiadina.
Sch'ins guarda sin la statistica dals ultims onns lura èsi cler: L'EHC San Murezzan ha gudagnà la gronda part dals derbys encunter il Cdh Engiadina. En in derby na va quai dentant betg per la statistica. Il gieu sto adina vegnir giugà fin a la fin. Pir lura èsi cler tgi ch’è la meglra squadra da hockey en Engiadina.
Il spezial dal derby è ch'ils giugaders s’enconuschan, era privat. Quai procura per las emoziuns.
San Murezzan vul gudagnar er il segund duel
L’emprim inscunter da questa stagiun tranter San Murezzan ed il Cdh Engiadina è stà ina clera chaussa. San Murezzan ha gudagnà cun 5:0. E tuttina n'è il gieu betg stà uschè cler sco il resultat. Er il Cdh Engiadina ha gì bunas schanzas, schanzas ch'han duvrà giugaders attents da San Murezzan. L’avantatg da l’equipa da l’Engiadin'Ota è forsa era questa giada ch'il cader da l’equipa è in zic pli vast che quel dal Cdh Engiadina. San Murezzan dispona da trais u quatter lingias ch’èn in zichel pli fermas. Quai po far la differenza. La squadra che dispona da pliras lingias ch'èn bunas da far gols vegn la finala a gudagnar.
La statistica pon ins emblidar. Mintga gieu ston ins l’emprim giugar.
