La curuna da hockey è enavos en Engiadina Bassa. Il club da hockey d’Engiadina ha mussà ina revantscha e battì San Murezzan. Da l’entschatta davent ha la squadra da Benny Wunderer vulì prender il scepter da la partida en maun. Il gol ch’è crudà en la 9avla minuta tras Linard Schmidt ha suttastritgà quest intent.
Igl era la partenza perfecta en ina partida ch’è adina stada stretga, nua che Engiadina era dentant adina in pass ordavant. Cura che las emoziuns èn vegnidas en il gieu han ils da l’Engiadina Bassa tegnì sang fraid e betg pli dà or da maun il gieu.
Il Cdh Engiadina ha dentant er gì fortuna, quai ch’i dovra er en ina tala partida da derby. La squadra da chasa n’ha betg be gudagnà il derby, mabain er impurtants trais puncts en il cumbat per ina plazza da playoff.
Puncts culminants dal 3. terz
Benjamin Wunderer guarda suenter la victoria gia sin il proxim gieu da la sonda
Alexander Aufderklamm tira facit ord vista da l'EHC San Murezzan
Il 3. terz
La famiglia da hockey Vonlanthen e la via da la commentatura Sandra Schmidt
La famiglia Vonlanthen è ina famiglia da hockey: La mamma ed ils dus figls giogan hockey, il bab è coach e chauffeur.
Sco giugadra tar las HCD Ladies ha Sandra Schmidt stuì bandunar l'Engiadina per persequitar ina carriera en il mund da hockey.
Puncts culminants dal 2. terz
Il 2. terz
Ils goalies Jan Lony e Men Noggler
Ils presidents da las duas squadras
Ruedi Haller dal Cdh Engiadina e Roberto Clavadätscher da l'EHC San Murezzan davart la collavuraziun da las duas squadras ensemen cun il HC Poschiavo ed il HC Zernez: Hockey Grischun Sud.
L'emprim gol da Linard Schmidt per il Cdh Engiadina
«Be 1:0 – uschiglio han tschels crai dà meglier»: Linard Schmidt
Marc Camichel da l'EHC San Murezzan vul en il segund terz reagir sin il gol ch'è crudà en las emprimas 20 minutas.
Il 1. terz
Ils trenaders avant il derby
Be paucas minutas avant il derby han ils dus trenaders Benjamin Wunderer dal Cdh Engiadina ed Alexander Aufderklamm da l'EHC San Murezzan anc chattà temp per ina prevista sin il derby engiadinais da mesemna saira.
Pli baud era il derby da hockey engiadinais savens ina «guerra». Las duas equipas d'Engiadina e da San Murezzan na regalavan sin il glatsch nagut ina a l'autra. Oz è quai in zic auter: Anc adina è il gieu tranter las duas pli grondas squadras da hockey engiadinaisas il pli impurtant gieu da l’entira stagiun, ma ina «guerra» n'èsi betg pli. Plitost ina battaglia, ch'ins vul en mintga cas gudagnar.
Statistica a favur da San Murezzan
Sch'ins guarda sin ils gieus da l'ultim decenni, alura è la bilantscha clera. Dals 13 duels ch'i ha dà tranter il Cdh Engiadina ed il EHC San Murezzan en segunda liga, ha San Murezzan gudagnà 11. Engiadina ha pia gudagnà be duas partidas, l’ultima giada il november 2022 a chasa en la halla da glatsch da Gurlaina a Scuol. Questa ultima victoria en l’atgna halla da glatsch, vegn franc ad esser la gronda motivaziun per ir en quest gieu.
Gieus stretgs pledan per Engiadina
Quatter giadas durant questa stagiun, ha il Cdh Engiadina gudagnà in gieu en la prolungaziun. Sch'i vegn pia stretg, alura è il team d'Engiadina preparà e pront. Stretgs n'èn ils ultims derbys per regla dentant betg stads. Per il solit è il duel ina chaussa clera a favur dals giugaders da San Murezzan.
Or da l'archiv
RTR ha adina puspè mussa live ils gieus da derby engiadinais.
