Dad in derby da hockey spetg’ins tensiun, emoziuns e cumbat. Pauc da quai è stà da vesair en l’emprim derby da la stagiun tranter il CDH Engiadina ed il EHC San Murezzan. Gia baud è San Murezzan i en questa partida en avantatg. E San Murezzan na ha betg pli dà or da maun la partida. In gol en l’emprim terz e trais gols en il segund terz han suttastritgà las ambiziuns da San Murezzan en quest duel. Il CDH Engiadina na ha propi mai savì ir il tempo da San Murezzan, e mai na era la dumonda tgi che gudogna l’emprim derby da la stagiun averta. Massa ferma era la prestaziun dal EHC San Murezzan.
San Murezzan massa ferm
Il CDH Engiadina ha bain empruvà da reagir sin il gieu da San Murezzan. Quai na è dentant betg grategià. Pir diesch minutas avant la fin dal gieu ha Fabrizio Mayolani fat l’emprim gol dad Engiadina. Il 1:6 era dentant be pli cosmetica da resultat. Il EHC San Murezzan ha pia gudagnà era l’emprim gieu da la nova stagiun. Revantscha en il duel tranter las duos pli fermas equipas da hockey engiadinaisas datti alura en il segund derby ils 19 da november. Alura dentant en il da chasa dal EHC San Murezzan a Ludains.
Prevista sin il derby engiadinais
La stagiun da hockey en segunda liga ha cumenzà per il EHC San Murezzan tut auter ch'ins vess giavischà quai. San Murezzan ha pers las emprimas trais partidas. Pir il quart gieu da la stagiun encunter il EHC Kreuzlingen-Konstanz ha San Murezzan a la fin pudì gudagnar. Il derby vegn uschia per l’equipa da l’Engiadina Auta en il gest mument. Ina victoria en il duel encunter il CDH Engiadina pudess dar motivaziun supplementara per il futur da la stagiun da hockey.
2. liga
Nov trenader e fitg giuvna equipa
Suenter blers onns a la banda dal EHC San Murezzan ha Alexander Aufderklamm fatg il pass tar la partiziun da juniors. Quella aveva Aufderklamm gia uss sut sia batgetta. Cun far il pass enavos ha el uss dentant anc dapli peda per ils giuvens talents. Sco nov trenader ha San Murezzan engaschà Andreas «Chutz» Schneeberger. L’equipa sto pia anc s'endisar vi dal nov sistem. Ella dovra anc peda.
Fitg giuvna è era l’equipa dal CDH Engiadina
La squadra da l’Engiadina Bassa è partida meglier en la nova stagiun. L’emprim gieu dal nov campiunadi ha il CDH Engiadina gudagnà en il temp supplementar. Il segund gieu ha Engiadina alura dentant pers. Per l’equipa da l’Engiadina Bassa va quai sco adina per mintga punct. Suenter la stupenta ultima stagiun, nua ch'il CDH Engiadina aveva fatg per l’emprima giada il pass en ils mezfinals vul ins sa chapescha repeter quel success. Sco adina vegn quai dentant a vegnir fitg grev.
