Siglir tar il cuntegn

Header

audio
EHC Arosa: Adrian Fetscherin ha bandunà il club
Or da Actualitad dals 24.01.2024. Maletg: EHC Arosa
laschar ir. Durada: 3 minutas 49 Secundas.
cuntegn

EHC Arosa Il temp suenter Fetscherin ha cumenzà

Avant intgins dis ha il mainafatschenta Adrian Fetscherin communitgà ch'el banduna l’EHC Arosa. Sur onns è el stà il tirafils dal club. Anc quest'emna vul il club dentant gia preschentar in nov mainafatschenta.

Adrian Fetscherin è stà dapli che mo in mainafatschenta per l'EHC Arosa. Durant ils ultims onns era el responsabel per las dumondas da medias, per il fanshop u er per la vendita da bigliets. En memoria restan dis nua che Adrian Fetscherin era ì durant dis da gieu sin pista per vender bigliets u ch'el prendeva cun tar ils gieus ordaifer artitgels dal fanshop per ils fans da la Bassa. Quel engaschi total sa chapiva da sasez per il Turitgais ch'ha lavurà en tut otg onns per l'EHC Arosa.

Dapli che quai ch'el ha scrit sin ils canals da social media n'ha el dentant betg vulì dir a RTR.

Decisiun a curta vista

Il cussegl d'administraziun da l'EHC Arosa è, malgrà ch'i era cler che Fetscherin chala, vegnì traplà in zic sin la chomma fallada. Ch'el chala definitivamain haja Fetscherin pir ditg 24 uras avant ch'el haja infurmà l'equipa, uschia il commember dal cussegl d’administraziun Peter Röthlisberger. Er davart ils motivs na sappia el nagut. Tge che saja in fatg è che Fetscherin saja adina stà fitg ambizius e ch'el haja vulì far il pass en la Swiss League. Qua haja il cussegl d’administraziun magari stuì frenar in zic, conceda Peter Röthlisberger.

En tut è Adrian Fetscherin stà otg onns mainafatschenta dal club da tradiziun.
Legenda: En tut è Adrian Fetscherin stà otg onns mainafatschenta dal club da tradiziun. EHC Arosa

Nov mainafatschenta duess vegnir preschentà quest'emna

Il temp suenter Fetscherin ha cumenzà per l'EHC Arosa. E sco Peter Röthlisberger ha ditg envers RTR veglia il club anc preschentar quest'emna in nov mainafatschenta. Il num ubain intgins indizis sin la nova persuna n'ha el dentant betg vulì tradir.

RTR actualitad 08:00

Artitgels legids il pli savens