Siglir tar il cuntegn

Header

cuntegn

EHC San Murezzan Talent en il gol Talina Benderer

Cun dus onns è la giuvna golia Talina Bender stada per l’emprima giada sin il glatsch. L’emprim ha ella emprendi dad ir cun patins ed ella ha dà a hockey. Cun nov-diesch onns ha ella midà en il gol. Ina posiziun ch’ella na midass cun nagut sin il mund.

Schon da pitschna si stat Talina Benderer sin il glatsch. L’emprim anc be cun patins, alura cun patins e bastun, e pli tard alura insacura cun patins, cun bastun, cun mascra e protecturs da goli. Dapi ch’ella è nov u diesch onns, dat la giuvna golia sin questa posiziun. Il pli gugent cura ch'umens tiran en sia direcziun e cura ch’ella sa parair ils tir e mussar bunas paradas.

audio
Talent da goli Talina Benderer dat cun ils umens
ord Actualitad dals 26.11.2022. Maletg: RTR
laschar ir. Durada: 3 minutas 17 Secundas.

Cumenzament tar il CdH Engiadina, uss campiunadi cun il EHC San Murezzan

L’amulain da hockey ha Talina Benderer emprendì a Scuol tar il CdH Engiadina. Schon ses bab Jon Peder ha giugà blers onns hockey, pli tard era el er trenader dal CdH Engiadina. Suenter ils emprims campiunadis cun l’equipa dad U15 dal CdH Engiadina ha ella midà a San Murezzan. En Engiadina Bassa na devi betg ina squadra dad U17 Top. Uschia era Talina Benderer sfurzada da midar tar il EHC. Cun San Murezzan gioga ella actualmain en il campiunadi. Dentant anc cun pauc success. L’equipa U17 Top da San Murezzan è actualmain a la cua da la tabella. La giuvna golia fa dentant experientschas, experientschas che gidan ella en ses svilup.

La finamira è da dar ina giada emprima ni segunda liga cun ils umens
Autur: Talina Benderer golia U17 Top EHC San Murezzan

Part da la squadra naziunala sut 18 onns

Il giuven talent Talina Benderer è er part da la squadra naziunala U18. Ina giada al mais trenescha la golia cun l’equipa naziunala. Uschia ha ella trais differentas pussaivladads da trenament. Tut cun la finamira da savair giugar ina giada emprima ni segunda liga cun in'equipa dad umens. Quella finamira na è segira betg exclusa. Er l’anteriura golia da la squadra naziunala da la dunnas Florence Schelling ha dà durant sia grondiusa carriera cun l’equipa dals umens da Bülach en l'emprima liga.

RTR Actualitad 17:00

Artitgels legids il pli savens

Scrollar a sanestra Scrollar a dretga