La finamira dal sport da cursa d’orientaziun è da vegnir uschè svelt sco pussibel da post tar post, quai cun agid d’ina carta. Gist questa cumbinaziun, leger bain la carta e currer, fascinescha la giuvna Eliane Auer da Trin Mulin.
Chattà il plaschair vid quest sport ha Eliane Auer grazia a sia mamma. Ed er ils dus fragliuns pli giuvens fan quest sport. Dasper frequenta Eliane Auer la scola chantunala a Cuira.
Il temp liber è deditgà al sport dad OL
Sco commembra da l'OLG Cuira (Orientierungslaufgruppe Chur) haja ella trais giadas ad emna trenament. Ina giada vegnia trenà la cursa d’orientaziun en ils guauds da Cuira, Domat, Panaduz, Trin e conturn, ina giada dettia in trenament da currer ed ina giada ad emna stettia era sin il program in program en halla cun divers exercizis. Dasperas trenescha la giuvna sportista da 16 onns er anc individualmain, quai principalmain cun ir a currer.
Las fins d’emna, surtut durant la primavaira e l’atun, sajan quasi adina reservadas per far cursas, quai en l’entira Svizra. Quai di Eliane Auer che sa legra da dastgar persequitar quels dis co ils profis cumbattan per las medaglias als campiunadis mundials a Flem Laax, pia quasi avant ses isch-chasa.
