- Daniel Hubmann, Joey Hadorn e Matthias Kyburz gudognan la cursa da staffetta als campiunadis mundials da cursa d'orientaziun a Flem Laax.
- Per la decisiun procursa Joey Hadorn che declassescha sco segund currider l'entira concurrenza.
- Daniel Hubmann (40) scriva istorgia - Cun ses segund titel cun la staffetta daventa el il pli vegl campiun mundial da cursa d'orientaziun da l'istorgia.
Distanzià tut ils Scandinavs
Il trio svizzer cun Daniel Hubmann, Joey Hadorn e Matthias Kyburz gudogna la cursa da staffetta cun in avantatg da 43 secundas sin ils Finlandais. La medaglia da bronz gudognan ils Svedais che perdan la finala 57 secundas sin ils Svizzers. Per Matthias Kyburz èsi gia la terza medaglia als campiunadis mundials da chasa. En la cursa sur la distanza mesauna avev'el gudagnà aur e sur la distanza lunga argient davos Kasper Harlem Fosser, il Norvegiais ch'ha cun sia staffetta stuì sa cuntentar cun il quart plaz.
Dunnas svizras procuran per ina finiziun quasi perfetga
Era la stafetta svizra da las dunnas po sa legrar d'ina medaglia. Il trio cun Elena Roos, Natalia Gemperle e Simona Aebersold gudogna en la davosa cursa dals campiunadis mundials la medaglia d'argient. Il titel da campiun mundial va a moda suverana a las Svedaisas cun il star Tove Alexandersson. Las Scandinavas èn stadas 4:28 minutas pli spertas che las Svizras. La medaglia da bronz gudognan las Norvegiasias (+9:59 minutas).
7 medaglias per la Svizra
Cun las cursas da staffetta èn ils campiunadis mundials da cursa d'orientaziun a Flem Laax ì a fin. Per l'equipa svizra cun lur scheftrenader Kilian Imhof èn in campiunadis mundials da chasa stads in grond success. Atletas ed atlets svizzers han gudagnà en las 6 cursas tut en tut 7 medaglias, 3 dad aur e 4 d'argient.
Matthias Kyburz è campiun mundial sur la distanza mesauna
Festival da medaglias per la Svizra sur la distanza mesauna. Matthias Kyburz gudogna aur avant ses collega d'equipa Joey Hadorn (+2:00 min.). Tar las dunnas gudogna Natalia Gemperle argient. Quai èn las medaglias 3 fin 5 per la Svizra als campiunadis mundials da cursa d'orientaziun a Flem Laax.
Per Kyburz èsi la settavla medaglia d'aur ad in campiunadi mundial. Tschintg giadas ha l'atlet da l'Argovia gudagnà en cursas singulas. Ses grond rival, il Norvegiais Kasper Harlem Fosser ch'è daventà campiun mundial sur la distanza lunga, ha stuì sa cuntentar cun il 7avel plaz (+3:24 min.).
Cumplettà il podest sco terz ed uschia gudagnà la medaglia da bronz ha surprendentamain l'Austriac Jannis Bonek (+2:07 min.). Ils ulteriurs svizzers: Florian Howald è vegnì 14avel (+5:36 min.) e Martin Hubmann è vegnì 27avel (+9:06 min.).
Uss po Natalia Gemperle far festa
Dus dis suenter che Natalia Gemperle ha stuì sa cuntentar cun il quart plaz sur la distanza lunga ha la Russa che parta dapi bun in onn per la Svizra gudagnà argient als campiunadis mundials da chasa. Pli sperta è sulet stada la gronda dominatura, la Svedaisa Tove Alexandersson. La favurita ha battì Gemperle per 2:18 minutas.
Cumplettà il podest sco terza ha la Svedaisa Hanna Lundberg (+2:34 min.). Betg ì sco giavischà èsi a Simona Aebersold. Suenter ses grond triumf sur la distanza luga ha il grond trumf svizzer stuì sa cuntentar be cun il 13avel plaz (+8:35 min.). Sabine Hauswirth è vegnida 18avla e Marion Aebi è vegnida 26avla.
Campiunadis mundials da chasa cumenza grondius per la Svizra
Simona Aebersold ha procurà per in grond success svizzer al campiunadis mundials da chasa. La sportista da 25 onns ha gudagnà la cursa roiala avant la gronda favurita Svedaisa Tove Alexandersson (+31 sec.) e la Norvegiaisa Andrine Benjaminsen (+7:20 min.).
Per las dunnas svizras èsi stà l’emprima medaglia dad aur en ina cursa da distanza lunga ad in campiunadi mundial dapi Simone Niggli avant 10 onns. Simona Aebersold ha mussà davent da la partenza ina cursa quasi perfetga en in territori fitg pretensius sur 11 kilometers e 500 meters differenza d’autezza. Gia baud èsi stà in duel fitg stretg cun la Svedaisa Tove Alexandersson.
Battì la gronda favurita
Simona Aebersold è stada tar mintga temp intermediar a la testa, er sche Tove Alexandersson ha pudì prender suenter bun ina minuta sin la davosa part da la cursa. La finala ha ina mesa minuta mancà a la favurita per batter la Bernaisa ch'ha uschia festivà ses pli grond success da la carriera. Enfin oz eran quai il titel da campiunessa d'Europa sur la distanza mesauna il 2022 en l'Estonia e las quatter medaglias, ina giada argient e trais giadas bronz, al campiunadis mundials il 2021 en la Tschechia.
Er las ulteriuras svizras han persvadì. Natalia Gemperle ha sco quarta manchentà ina medaglia per be 6 secundas. Elena Roos ha terminà la cursa sco 6avla.
Matthias Kyburz davos il grond favurit
Curt suenter il success da Simona Aebersold han er ils umens procurà per ina plazza da podest. Matthias Kyburz è currì sin il segund plaz. Sulet il favurit norvegiais, Kasper Harlem Fosser, il partenari da Simona Aebersold, è stà pli svelt. La finala han 51 secundas mancà a Kyburz per aur. Dà ord maun ha Matthias Kyburz il titel principalmain sin il davos tschancun da la cursa. Per l'actual meglier atlet svizzer da cursa d'orientaziun èsi gia la 13avla medaglia a campiunadis mundials.
Cumplettà il podest sco terz ed uschia gudagnà bronz ha surprendentamain il Finlandais Olli Ojanaho, quai dentant gia cun in retard da 4:31 minutas. Er mussà ina buna prestaziun han ils ulteriurs svizzers. Daniel Hubmann è vegnì 6avel (+5:24 minutas) e Joey Hadorn è currì cun 3 secundas retard sin il meglier atlet svizzer da tut il temp sin plaz 7.
Festa d'avertura cun passa 40 pajais
Mardi saira hai dà la festa d'avertura per quest event cun passa 300 atlets ed atletas da passa 40 pajais. Suenter divers pleds da bainvegni, tranter auter er dal cusseglier guvernativ Jon Domenic Parolini èn vegnidas preschentadas tut las bandieras dals 44 pajais che cumbattan ils proxims dis per las medaglias a Flem Laax. L'entir act festiv è vegnì embellì cun musica d'Enrico Lenzin ch'è vegnì enconuschent ord l'emissiun «Die grössten Schweizer Talente».
Campiunadis mundials e lura in'emna cursa per ils populars
Dals 11 fin 16 da fanadur van radund 300 atletas ed atlets or da passa 40 naziuns a la partenza als campiunadis mundials da cursas d’orientaziun a Flem Laax. Cumbattì per medaglias vegn en las disciplinas distanza lunga, distanza media ed en la staffetta. Suenter ils campiunadis mundials resta la regiun da Flem Laax il mecca da quest sport. Lura spetga la Swiss Orienteering Week nua che 4’500 sportists populars da l’entir mund curran da post tar post.
Ils campiunadis mundials a Flem Laax èn in dals gronds puncts culminants en las carrieras dals atlets svizzers. Dastgar cumbatter per medaglias a chasa capita be mintga bun 10 onns. L’emprims campiunadis mundials en Svizra èn vegnids organisads il 1981 a Thun. Il 2003 è Rapperswil-Jona stà en roda e la davosa giada, il 2012, ha Losanna dastgà manar tras quest event.
I spetga cursas pretensiusas
Las cursas han lieu en ils guauds da Flem sin in’autezza da ca. 1’100 meters sur mar, quai en in territori fitg pretensius entras la bova da crappa d’avant bun 9'500 onns. Il territori è fitg malguliv, dentant er fitg attractiv. Ils guauds da cursa èn stads serrads ils davos onns per tut ils participants. Vi da quai vegnia era sa tegnì, di il scheftrenader dals Svizzers, Kilian Imhof.
4 medaglias è la finamira.
La finamira dal team svizzer che va a la partenza cun mintgamai tschintg atletas e tschintg atlets è da gudagnar almain quatter medaglias. Ils gronds trumfs èn Simona Aebersold ch’ha gia gudagnà otg medaglias a campiunadis mundials, dentant anc mai ina dad aur, il rutinà Daniel Hubmann ch’è gia dapi 20 onns a la partenza e ch’è gia daventà otg giadas campiun mundial u Matthias Kyburz, l’actualmain meglier atlet svizzer ch’ha er gia gudagnà 13 medaglias a campiunadis mundials, da quai sis en aur.
Flem Laax en il center dal sport dad OL
Ils organisaturs spetgan durant mintga di da cursa radund 6’000 aspectaturs, quai principalmain en l’arrivada en il center da sport Prau la Selva nua ch’i vegn er bajegià ina tribuna per bun 2’000 persunas. Il budget per quests campiunadis mundials da cursas d’orientaziun a Flem Laax munta a radund 3 milliuns francs. Bunamain la mesadad dals daners vegnan dal maun public.
