Marvin, Nevio, Demian e Liano èn ils uffants da Heidi e Wendelin Casutt. Els èn naschids e creschids si sin il bain puril da la famiglia a Falera. Ina vischnanca en in territori da skis che n'ha tant sco nagina relaziun cun il hockey sin glatsch.
Tuttina han lur figls piglià fieu per il hockey. S'avischinads al glatsch ed als patins èn quels – cun far patinadi artistic e lura tras la scola da hockey a Flem. Cura ch'ils geniturs han vis che hockey è bler dapli che mo hobi, han els spluntà tar il club da hockey da Cuira.
Il hockey ha lura survegnì ina tala dimensiun tar ils Casutt's, ch'els èn sa tschentads tar las equipas d'elita da juniors tar il HC Tavau. In club che vala sco in dals megliers en Svizra cura ch'i va per promover talents giuvens da hockey. Liano è dentant en la U12 dal HCD, Demian en la U14 e Nevio en la U16. Marvin ha entant cumenzà in emprendissadi, ed il hockey na stat betg pli uschè en il center.
Nus avain empermess da far tut noss pussaivel per lur siemi da hockey. Perquai avain nus in segund domicil a Tavau. Ils uffants van là a scola ed èn stedi vi da trenar e dar gieus da hockey. Ina vita, in mintgadi da famiglia usità na datti quasi betg.
Per la famiglia Casutt constatti. Tuts train vi dal medem sughet. Tut è organisà minuziusamain. Ils geniturs sa barattan cun esser a Tavau e guardar dals uffants.
La seria – «Mission Pee Wee»
Dasper lur manaschi puril a Falera lavura Heidi anc cun in pensum dad 80 pertschient. Hockey custa, abstrahà da tut l'equipagi ch'i dovra sin e sper il glatsch, ils massa kilometers cun l'auto durant in onn, vitiers l'abitaziun a Tavau. Era sche la schanza è minima ch'i grategia propi cun la via al profi da hockey, na vegnian els mai a s'enriclar ni guardar enavos e sa dumandar daco ch'els hajan fatg tut quai.
Sche nus vesain che noss figls na dattan betg pli tut per il hockey, sch'il fieu n'arda betg pli, lura smettain subit.
Heidi e Wendelin Casutt èn sa decidids da far tut per che lur figls pon cumbinar scola e hockey sin glatsch. Entras lur figls èn els daventads gronds fans da hockey. E sch'i na grategia betg cun daventar profi da hockey, sch'els possian guardar enavos savend ch'els hajan gì ina scolaziun e scola da vita excellenta, dapli na dovria betg.
Demian e Gianluca e lur aventura «Pee-Wee»
Els han gia sco buobets tegnì l'emprima giada in pal da hockey, ed han gia baud piglià fieu per quest sport d'equipa. La via da Demian Casutt da Falera e da Gianluca Andri da Panaduz è sa cruschada tar l'EHC Cuira. Avant dus onns han els lura midà a Tavau nua che lur talent vegn promovì. Actual èn els en l'equipa d'elita U16 dal HCD.
Ch'els han talent è sa mussà l'ultim enviern – cura ch'els èn vegnids selecziunads per l'equipa dal HCD ch'ha pudì ir en il Canada per giugar il pli impurtant turnier da hockey da juniors dal mund. Il turnier Pee-Wee. Quella aventura ed experientscha han rinforzà Demian e Gianluca per lur finamira da daventar profi – e per filar vi da lur siemi d'insacura giugar en la pli impurtanta liga da hockey dal mund, la NHL.
