Gea, cler: la Cuppa Spengler è il turnier da chasa dal Club da hockey da Tavau. E gea, cler: Friburg-Gottéron vul repeter a Tavau il success da l'onn passà nua che l'equipa ha gudagnà ses emprim titel insumma.
Sis equipas, duas gruppas, 11 gieus ed il cumbat per la pli veglia trofea da hockey dal mund. Quai è la Cuppa Spengler.
Il mitus da la Cuppa Spengler è creschì or da la tradiziun. Avant passa 100 onns hai dà a Tavau l'emprim turnier da hockey internaziunal. L'emprima Cuppa Spengler l'onn 1923 è stada il tun da partenza d'in viadi extraordinari. Il mitus è lura vegnì rinforzà cun las equipas da l'ost.
Fin a l'entschatta dals onns 90 dal davos tschientaner n'eri per in fan da hockey betg pussaivel da vesair ils fantastics giugaders da la gronda naziun da hockey UdSSR, vul dir da l'Uniun da las republicas socialisticas sovieticas. I deva be in'excepziun: la Cuppa Spengler.
A partir dals onns 60 eran equipas da l'anteriura UdSSR e sa chapescha er da la Tschechia giasts permanents da la Cuppa Spengler. E gist las fermas equipas da Moscau han dominà il turnier durant ils onns 80. Spartak Moscau ha gudagnà durant quel decenni tschintg giadas il turnier.
Per dar frunt a la dominanza dal hockey russ han ils organisaturs dal pli vegl turnier da hockey dal mund gì ina idea geniala. Per l'emprima giada han els envidà l'onn 1984 giugaders canadais da dar sco Team Canada la Cuppa Spengler. L'idea da metter en pè in'equipa cun giugaders canadais che derivan da la NHL, dentant er dals pajais cunfinants e da la pli auta liga da hockey svizra, la liga naziunala A – era sco il da sis en il lotto. La magia ch'il Team Canada ha cumenzà a derasar era sco la magia da vesair pli baud ils megliers hockeyans dal bloc da l'ost.
Questas trais ingredienzas han procurà e procuran anc adina per il mitus da la Cuppa Spengler ch'è era passa 100 onns suenter sia fundaziun anc adina fitg popular. Nagliur auter vegn il sport da hockey festivà e celebrà uschè intensiv sco durant la davosa emna da l'onn a la Cuppa Spengler a Tavau.