Il sport da hockey è mess en tgina a Sandra Schmidt. Gia il bab, dentant er ils frars da la giuvna giugadra da hockey da Sent han fatg quest sport. Uschia era quai cler che la giuvna Sandra Schmidt tira era en ils patins ed emprenda il sport da hockey. L’amulain da hockey ha ella emprendì tar il Cdh Engiadina. Via il Cdh ha ella alura fatg il pass en la liga naziunala B da las dunnas tar l’equipa da Kreuzlingen-Konstanz, e dà là tar la nova equipa dal HC Thurgau Ladies en la pli auta liga da hockey da las dunnas en Svizra - l’uschenumnada Women’s Hockey League.
Focus sin il HC Thurgau
Sandra Schmidt dat gia la terza stagiun en il dress da l’equipa HC Thurgau Ladies. En questa terza stagiun vul la giuvna da 18 onns propi metter chomma en la pli auta liga da hockey da las dunnas en Svizra. Perquai sa focussescha Sandra Schmidt mo pli sin il HC Thurgau. Ella lascha d'in maun ils gieus cun equipas dad umens, ed ella fa era ina pausa da la squadra naziunala da las dunnas sut 18 onns. Cun lavurar en Engiadin'Ota è il pensum gia uschia fitg pretensius. Davent da l’Engiadina va ella in di l’emna a Cuira a scola e duas sairas a Kreuzlingen a trenament. La fin d’emna è ella sin viadi cun la squadra dad in gieu a l’auter.
HC Thurgau equipa da surpraisa
La squadra da las dunnas dal HC Thurgau è creschida or da l’equipa da Kreuzlingen-Konstanz e quella da Weinfelden. Las duas squadras sa chattan uss en l’organisaziun dal HC Thurgau. Uschia po l’equipa da las dunnas profitar per l’emprima giada dad ina infrastructura professiunala. La finamira da la squadra HC Thurgau Ladies è da terminar il campiunadi sin il podest. Las pli fermas equipas vegnan er questa stagiun puspè ad esser Lugano e Turitg.
