Il club da hockey Arosa ha inoltrà la dumonda per midar da la MyHockey League en la Swiss League la stagiun che vegn. Era sch'i dettia clers problems en la liga, ha il club inoltrà ina dumonda per dar en la segund'auta liga da la Svizra, scriva il club sin sia pagina d'internet.
I restia anc bler da sclerir: per exempel la cumposiziun da la liga, la grondezza, il modus, la tematica davart giugadurs da l'exteriur, daners da marketing. E l'Uniun da Hockey Svizra n'haja betg dà ina resposta sin dumondas da l'EHC Arosa davart quels temas. Tuttina veglian ins sa participar en la liga.
Per il club fissi pussaivel da retrair la dumonda fin il cumenzament da favrer senza consequenzas. Questa resalva fa Arosa damai ch'i n'è actualmain betg cler co la Swiss League vegn a funcziunar la stagiun che vegn.