Sco l'EHC Cuira ha communitgà, hajan els inoltrà a l'associaziun SIHF ina dumonda da giugar ina liga pli aut. Gia il fatg che Cuira haja dapi decennis ina da las pli grondas organisaziuns da juniors da la Svizra sid-orientala demussia il grond potenzial dal club. Ins saja era dapi in detg temp vid preparar l'organisaziun dals juniors per las sfidas dal futur.
La nova halla da trenament en la citad da Cuira porscha era tar l'infrastructura bunas premissas per il futur. Ins saja era pertschart ch'i dettia anc bler d'elavurar, tar las finanzas , l'organisaziun ed era en il sectur sportiv.
Anc spetga inqual sfida
Far ord Cuira in club per la Swiss League saja dentant ina sfida da hercules, di il president dal EHC Cuira, Christian Aliesch. Sin sco er sper il glatsch spetga anc ina massa lavur. Ils puncts impurtants :
- Midar la furma giuridica d'ina uniun en ina societad d'aczias (AG)
- Dublegiar il budget dal club da 1,3 milliuns sin bun 2,5 milliuns francs
- Dumagnar cun l'equipa almain en ils mezfinals dals playoffs en la MySports League
Tut quai sappia mo gartegiar cun grond sustegn dals commembers, sponsurs, fans u er da la citad da Cuira. Spezialmain la sfida finanziala saja immensa, punctuescha Christian Aliesch. In emprim pass haja il club fatg cun la dumonda a l'Associaziun da hockey svizra. Las grondas sfidas spetgan dentant anc sin il club da la chapitala grischuna. Ed il president precisescha ch'els na prendian nagins ristgs per metter en privel il club.
