Il Club da hockey Partenz-Signuradi ha relaschà ses trenader, Tomas Tamfal immediatamain suenter il gieu cunter Herisau mesemna saira. Ils motivs na sajan betg sportivs, suttastritga il president Stephan Weber envers la Südostschweiz. Partenz-Signuradi gioga en il mument sia meglra stagiun en l'emprima liga.
Problems persunals
Ils motivs per quest pass surprendent sajan persunals. Tenor Weber n'haja Tamfal betg pli trenà la squadra en la maniera spetgada suenter il gieu cunter Lucerna. El haja lura er refusà da far sia lavur durant il gieu cunter Herisau. Il president haja lura communitgà sia decisiun da relaschar el en la gardaroba directamain suenter il gieu. Tscherts giugaders, uschia Weber, na sajan betg pli stads pronts da giugar sut Tamfal. Il defensur Andreas John ha ditg envers la Südostschweiz che la squadra saja d'accord che saja donn che n'haja betg funcziunà cun el. La partenza da Tamfal saja pauc bella, ma inevitabla.
L'onn passà aveva Tamfal bandunà il EHC Cuira per sumegliants motivs. El aveva cumenzà tar Partenz-Signuradi questa stagiun ed avess anc gì in contract fin il 2023. Tgi che suonda a Tamfal n'è anc betg cler. Tar il proxim gieu la dumengia stat il trenader d'assistenza Kevin Fleckenstein a la banda.