Gia dapi 16 onns gioga Nino Niederreiter en la meglra liga da hockey dal mund, en la National Hockey League. Actualmain è el in dals attatgaders da l’equipa canadaisa dals Winnipeg Jets. Il pensum da Nino Niederreiter en la NHL ed era en l’equipa naziunala è enorm. Durant ils ultims onns ha il sportist da Cuira adina giugà da quai da 100 partidas sin il pli aut nivel. Per che ses corp vegnia da prestar quai dovri ina preparaziun minuziusa, di l'atlet. Quella capita surtut durant ils mais da la stad, cura ch'il campiunadi en la NHL ed ils turniers gronds fan pausa.
Nino Niederreiter enconuscha la situaziun da trenar sulet
Auter che per exempel en la National League en Svizra, as preparan ils giugaders da la NHL sulet sin la nova stagiun. Quai vul dir ch’els treneschan a chasa sin la nova stagiun, en il cas da Nino Niederreiter è quai Cuira. Niederreiter ha dentant d'accumplir las pretensiuns dal coach d’atletica dals Winnipeg Jets. El trenscha tenor ils plans da quel, dentant po el er far quai co ch’el vul. Per turnar puspè en buna furma tar sia equipa en il Canada ha Nino Niederreiter durant las emnas ch’el è en il Grischun ina atgna equipa. Ses coach persunal è Michi Bont da Lantsch. Il trenader rutinà procura che Niederreiter vegnen la furma giavischada, el organisescha dentant era hallas da glatsch, per ir a trenar sin il glatsch. Be dacurt ha Nino Niederreiter gì contact cun il trenader dal HCD Josh Holden. Uschia ch'il hockeyan da Cuira fa puspè part dal trenament da glatsch cun ils giugaders dal Club da hockey da Tavau.
