Ueli Hofmann ed Andy Plüss èn enconuschents en la scena da hockey sco giugaders e trenaders. Lur carrieras activas èn però gia daditg a fin. Curt suenter ch'els sezs han terminà da giugar activ hockey han els vulì dar vinavant lur grondas experientschas la proxima generaziun ed han fundà il camp da hockey. Quel fa uss gia per la 30avla giada fermativa a Scuol. Sut l’ensaina da trenaders professiunals emprendan circa 100 giuvenils il sport da hockey.
Giast spezial: Nino Niederreiter
Il camp da hockey a Scuol ha ina lunga tradiziun. E tradiziun è era ch’in star da hockey actual fa visita al camp da hockey. Questa giada è il star da hockey grischun Nino Niederreiter stà sin il glatsch a Scuol. 20 onns suenter ch'el è stà qua sco giuven da 13 onns è el turnà a Scuol sco star da la NHL e dals Winnipeg Jets. Niederreiter ha bleras bunas regurdientschas al camp da hockey a Scuol. Per el èsi cler, ch’el vul uss dar enavant insatge da sias grondas experientschas als giuvens.
Impressiuns dal camp da hockey a Scuol
-
Bild 1 von 3. Nino Niederreiter al camp da hockey. Bildquelle: RTR.
-
Bild 2 von 3. In star da la NHL a Scuol. Bildquelle: RTR.
-
Bild 3 von 3. Giubileum da 30 onns camp da hockey. Bildquelle: RTR.
Hockey è oz tut in auter sport
Durant ils ultims trais decennis è il sport da hockey sa midà ferm. Il sport è vegnì bler pli spert, bler pli fisic. En ligas pli autas ch'ins gioga e pli spert ch'il sport è vegnì, perquai èsi impurtant d'emprender da giugar cun tempo gia da pign ensi. Era quai emprendan ils giuvenils en il camp da hockey dad Ueli Hofmann ed Andy Plüss.