Ina carta da stagiun inclus la Cuppa Spengler custa fin a 3’350 francs, bun 600 francs dapli che fin uss. Ina carta da stagiun per ils megliers plazs da seser senza la Cuppa Spengler po custar fin a 2’000 francs.
La raschun per quest augment è tenor il CEO Marc Gianola ina giada ils custs che s’augmentian onn per onn. Tut vegnia pli char, davent da la liongia da brassar, fin il viadi cun la Viafier retica ch’è inclusa en tut ils bigliets fin la squadra che custa adina dapli.
Plinavant ha il HCD introducì in nov sistem da bigliets. Na po il fan betg visitar in gieu da chasa dal HCD po el dar enavos sia carta da stagiun en la vendida per uschia survegnir enavos intgins daners per quest gieu. Quests daners vegnian scrits da bun sin in conto ch’il possessur da la carta da stagiun po lura retrair per quella da l’onn proxim. Uschia stoppian ins relativar quest augment da fin 25%, manegia Marc Gianola. E cun quest nov sistem speria il HCD er d’occupar meglier il stadion tar ils gieus da chasa.
Per ils fans tut auter ch'in augment moderà
L’augment dals pretschs per las cartas da stagiun 2026/27 ha procurà per intginas lingias grassas en il forum dals fans dal HCD. Betg dispit l’augment disturba ils fans, dentant la formulaziun en ina brev ch’il Club da hockey da Tavau ha tramess a mintga possessur d’ina tala carta.
En questa brev scriva il HCD d’in augment moderà. 25% n'haja però da far pauc cun moderà, uschia ils fans. E tuttina, cumpareglià cun ils ulteriurs clubs da la National League è il HCD, quai che pertutga ils pretschs, pulit a la cua da la tabella. Pli bunmartgà èsi sulet tar ils Rapperswil-Jona Lakers.