Evelina Raselli è senza dubi ina da las pli profiladas hockeyanas svizras. Cun l’equipa da las dunnas dal HC Lugano ha la sportista da Poschiavo gudagnà tschintg giadas il titel da campiunessa svizra. Uschia è ella era vegnida interessanta per l’equipa naziunala da hockey, nua ch’ella era ensemen cun bleras autras ina pioniera dal sport da dunnas.
Il punct culminant en il dress da l’equipa naziunala è segir stà la victoria da la medaglia da bronz tar ils gieus olimpics l’onn 2014 a Sotschi.
En Svizra gia profilada, lura il pass a l’exteriur
Suenter in pèr titels da campiunessa svizra tar il HC Lugano ha Evelina Raselli midà pervia da sia professiun tar l’equipa da las dunnas dal SC Reinach. Da là ha la hockeyana lura ristgà il pass en l'exteriur. La stagiun ha ella terminà tar Brynäs en Svezia. Suenter ina ulteriura stagiun a Lugano è lura vegnì la stagiun 2021/2022 il pass sur la mar en ils Stadis Unids tar Boston Pride.
Evelina Raselli è stada l’emprima giugadra svizra che ha fatg il pass en la pli auta liga da hockey nordamericana. Per l’emprima giada en sia carriera è ella stada profi ed ha pudì viver da ses sport.
Proxim pass sper il glatsch tar HCD Ladies
Suenter sia aventura en ils Stadis Unids ha Evelina Raselli terminà sia carriera per far sper il glatsch il proxim pass. Ella ha fatg la scolaziun sco trenadra ed è vegnida l’emprima trenadra d’assistenza tar l’equipa naziunala sut 18 onns. Suenter è ella vegnida engaschada da l’equipa da las dunnas da HCD. Emprim il schaner 2025 sco trenadra d’assistenza e dapi questa stagiun sco trenadra principala da las HCD Ladies.
En questa posiziun emprova ella da dar vinavant sia gronda experientscha e da far cun l’equipa il proxim pass. Actualmain èn las HCD Ladies sin plazza 6 da la tabella ed uschia sin ina plazza da playoff.