Cun set onns ha Alessandro Solèr cumenzà ad ir cun mountainbike tar il Club da Velo Surselva a Glion. Dapi trais onns fa el era part al cader regiunal da la Svizra Orientala. Cun la selecziun da Swiss Cycling per il cader naziunal, il pli giuven cader, suonda uss il proxim pass. Grazia a questa nominaziun po il lumnezian da nov profitar da meglras cundiziuns da trenament – cundiziuns pli professiunalas.
El suonda uschia er a sia sora Chiara Solèr, ch’è ida ina sumeglianta via e ch’è oz cun 18 onns gia dapi quatter onns en il cader naziunal e sa participescha quest onn per la davosa giada en la categoria da las U19.
Dasper l'ir cun mountainbike frequenta Alessandro Solèr ses segund onn a la scola da talents a Glion. Cun il nov onn da scola mida el lura a la scola media spezialisada FMS a Glion.
Tranter ils top 15 a la «Bike Revolution»
Che Alessandro Solèr è sin la dretga via mussa era sia prestaziun a la cursa da Bike Revolution a Cuira. En sia categoria è il giuven sportist da Lumbrein vegnì 12avel da 50 juniors. Sin il victur Fynn Lanter, il campiun svizzer dals U17 en la cursa da ciclissem champester, ha el pers 1:34 minutas.
