Siglir tar il cuntegn

Header

Legenda: Il duel Nino Schurter cunter Mathias Flückiger va en la proxima runda. Keystone
cuntegn

MTB a Lai Schurter vul il record dad Absalon

Suenter ils gieus olimpics a Tokio, il campiunadi d’Europa a Novi Sad en la Serbia ed il campiunadi mundial a Val di Sole en l’Italia spetga il proxim punct culminant sin ils mountainbikers svizzers, las cursas da la cuppa mundiala a Lai.

Nino Schurter vul egualisar a sia cursa da chasa il record dal Franzos Julien Absalon ch’ha gudagnà en sia carriera 33 cursas da la cuppa mundiala. Mathias Flückiger vul far revantscha per il segund plaz al campiunadi mundial ed er far in ulteriur pass direcziun cuppa mundiala generala. Avant las duas davosas staziuns a Lai e duas emnas avant il final a Snowshoe en ils Stadis Unids ha Flückiger in avantatg da 235 puncts sin il Tschec Ondrej Cink. Nino Schurter ha gia in dischavantatg da 435 puncts sin Flückiger. Tar ina victoria en la cursa da cross country datti 250 puncts, plinavant datti 125 puncts per ina victoria en la cursa da short track.

audio
Impressiuns al lieu
05:58 min, Actualitad dals 03.09.2021.
laschar ir. Durada: 05:58 minutas.

Croda la marca da Julien Absalon a Lai?

Nino Schurter metta cumplainamain il focus sin la cursa da cross country da la dumengia. El vul gudagnar per la terza giada la cursa da la cuppa mundiala a Lai ed uschia egualisar il record da Julien Absalon, il Franzos ch’è sa retratgs avant trais onns. Schurter emprova gia dapi passa in onn da gudagnar sia 33avla cursa, in record ch’ha survegnì adina dapli muntada. Ed i saja ina bella finamira che dettia era motivaziun da cuntinuar, di Nino Schurter ch’è daventà avant in’emna per la 9avla giada campiun mundial.

Crème de la crème a Lai

Lai po organisar quest onn per la 5avla giada cursas da la cuppa mundiala da mountainbike. Plinavant ha Lai manà atras il 2018 ils campiunadis mundials al pe dal Rothorn. E sco gia ils davos onns è er questa giada quasi l'entira elita mundiala a la partenza cun excepziun dal Ollandais Mathieu van der Poel ed il Brit Tom Pidcock ch'è vegnì campiun olimpic a Tokio.

Avant in onn avevan las cursas a Lai stuì vegnir annulladas pervia da la pandemia da Corona. Quest onn han ils da Lai survegnì glisch verda. Las cursas pon schizunt vegnir manadas atras avant in dumber limità da fans. Mintga di pudessan 10’000 persunas visitar las cursas a Lai, en total 30’000 persunas sur tut ils trais dis da cursa. Enfin il venderdi da mezdi eran però vegnids vendids be bun 8’000 tickets. Per pudair entrar sin l’areal da cursa sto vegnir mussà avant in certificat da corona u in test PCR negativ.

RTR actualitad 17:00

Artitgels legids il pli savens

Scrollar a sanestra Scrollar a dretga