L'EHC Cuira è campiun svizzer da la My Hockey League. En il stadion da l'Obere Au a Cuira ha il club dal Grischun gudagnà il 5avel gieu dal final dals playoffs cunter Seewen, quai cun 3:1.
Suenter l'emprim terz stevi anc 0:0. En il segund terz è l'EHC Cuira lura ì en avantatg cun 1:0. En il davos terz han lura Seewen anc pudì far in gol, ma a Cuira è quai gartegià duas giadas. Il club dal Grischun ha uschia gudagnà la seria da best of five cun 3:2.
Gia avant era cler che l'EHC Cuira fa il pass en la Swiss League, la segund'auta liga svizra.
Tut è puspè avert
En il quart gieu cunter Seewen ha Cuira stuì gudagnar, ed ha gudagnà cun 2:1. La seria da best of 5 è uschia equilibrada. Suenter in ferm emprim terz cun dus gols per l'EHC Cuira, ed in segund terz cun in gol per l'EHC Seewen n'ha il terz terz purtà nagina decisiun. Seewen ha pers 1:2 encunter Cuira, ed ha uschia manchentà la segunda schanza da daventar campiun.
Cuira è sa tratg or da la buglia
Cuira mantegn la schanza da daventar campiun svizzer en la My Hockey League. En il terz gieu da la seria da final ha Cuira gudagnà a chasa cunter Seewen cun 3:2 ed uschia scursanì la seria da best of 5 sin 1:2. La decisiun è capitada en la 10avla minuta cun il gol da Greg Halberstadt. Quel ha sajettà tuts trais gols. Ramon Schnüriger da Seewen ha anc tutgà ina giada en la 53avla minuta, ils Svizzers n'han dentant betg pli pudì volver la partida.
Era il segund gieu è pers
En il segund gieu a Seewen aveva Cuira stuì cumbatter ed ir en la prolungaziun suenter in 3:3 en il temp regular ( 1:1 | 1:1 | 1:1 ). La prolungaziun è restada senza gols, uschia ch'il gieu ha stuì vegnir decidì en il shootout. Ditg han ils giugaders mintgamai cumpensà il resultat dal contrahent. Pir il 20avel sajet ha purtà la victoria a Seewen.
En la seria da best of 5 maina il HC Seewen ussa cun 2:0. Uschia sto il EHC Cuira gudagnar las proximas trais partidas per daventar campiun da la My Hockey League.
Cuira cumenza mal il final
En il stadion Thomas Domenig aveva Cuira pers l'emprim gieu da la seria best-of-5 cunter Seewen cun 2:3. Gia en la segunda minuta aveva Cuira incassà l'emprim gol, e suenter l'emprim terz mussava la tavla da resultat in 0:3. En il segund terz aveva il club grischun lura pudì suenter in pau, cun sajettar dus gols. Dapli gols n'avevi dentant betg dà, ni da Cuira ni da Seewen, uschia ch'il gieu è ì a fin 2:3.
Bunas premissas per in success
La gronda festa da promoziun ha gia gì lieu suenter la victoria en il quartfinal encunter Langenthal, ch'ha muntà la promoziun en la segund'auta liga, la Swiss League. Ils responsabels da l'EHC Cuira han dentant adina ditg ch'els veglian ir si sco campiun, pia cun gudagnar il campiunadi da la My Hockey League.
En il mezfinal n'han els laschà nagina schanza a l'EHC Thun. A moda suverana han ils Grischuns gudagnà la seria cun 3:0. En l'emprima runda da playoff encunter Langenthal, ha Cuira gudagnà cun 3:1 la seria da best-of-5.
Cun Seewen spetga uss dentant anc ina giada ina dira lutga sin Cuira. Seewen ha finì la qualificaziun sin plazza 3, ha lura gudagnà la seria dal quartfinal encunter Franches-Montagnes cun 3:2, ed en il mezfinal encunter Huttwil han els persvas cun in hockey fitg attractiv e gudagnà la seria cun 3:1.
En ils duels directs da la qualificaziun ha Cuira gudagnà tuttas quatter giadas, quai dentant adina a moda stretga. Cun 5:3 e 3:1 ils gieus da chasa, e cun 3:2 ed 2:1 ils gieus ordaifer.
Promoziun cun sfidas e malsegirtad
La victoria dal campiunadi fiss anc la tscharescha sin la turta per l'equipa da la chapitala grischuna. Suenter 16 onns abstinenza turna Cuira enavos en la segund'auta liga svizra ed uschia enavos sin la charta svizra dal hockey professiunal.
Il return en la Swiss League è dentant er connectà cun intginas sfidas e malsegirtads. Per ina sfidas sportivas: L'equipa sto vegnir rinforzada per esser cumpetitiva ina liga pli auta. E lura datti las sfidas operativas: Per l'ina sto vegnir fundada ina SA ed il budget vegnir auzads sin bun 2,5 milliuns francs. Qua èn ils responsabels actualmain er a la tschertga da novs sponsurs. Per pudair dar en la Swiss League stoi era dar singulas renovaziuns en il stadion che fa, per part, ruina.
E la malsegirtad da questa promoziun è la liga sezza. La Swiss League va actualmain pulit pe zop. Pir dacurt ha Martigny communitgà ch'els sa retiran da la liga, per motivs finanzials. Ed er l'EHC Olten, ina da las equipas dominantas da la liga dals ultims onns, fa sco para ponderaziuns da chalar cun il hockey professiunal en la Swiss League. Per la liga fiss gliez in pulit debachel ed i muntass era ch'i dess lura mo 8 equipas proxima stagiun. Gia en ils onns passads avevi dà equipas ch'avevan fatg voluntariamain la relegaziun en ina liga pli bassa. Il problem: La National League, la pli auta liga da hockey svizra è dapi intgins onns quasi in circul elitar, far la promoziun è fitg greva per clubs da la Swiss League – perquai ch'il club na sto betg mo gudagnar il campiunadi, mabain alura era anc batter la mendra equipa da la National League.
