Siglir tar il cuntegn

Header

Philippe Vincenz e Donat Albin
Legenda: Philippe Vincenz e Donat Albin na bandunan tuttina betg l'equipa. RTR
cuntegn

Nagina successiun Ils trenaders dal CB Trun/Rabius restan tuttina

Donat Albin e Philippe Vincenz restan trenaders dal CB Trun/Rabius, schegea ch'i avevan demissiunà cun la fin da la stagiun 21/22.

Donat Albin e Philippe Vincenz restan fidaivels al club da ballape Trun/Rabius. Quai han els decis ils ultims dis, suenter ch'i n'è betg reussì als responsabels dal club da chattar ina successiun per els dus.

Questa primavaira aveva il duo anc communitgà ch'i chalan sco trenaders dal club da 3. liga cun la fin da la stagiun 2021/2022. «Nus essan vegnids animads da pliras varts da cuntinuar, era da vart da plirs giugaders», di Donat Albin. Els restan trenaders per la stagiun d'atun che vegn. «Cun quai vulain nus dar temp al club da chattar ina buna soluziun».

Atgnamain èsi tragic ch’i na reussescha betg da chattar en Surselva in trenader per in’equipa da 3. ligia.
Autur: Donat Albin puspè trenader dal CB Trun/Rabius

Ils responsabels dal CB Trun/Rabius han consultà bunamain 40 persunas cun las abilitads da surprender l'emprima equipa. Qua dentant senza success. «Atgnamain èsi tragic ch’i na reussescha betg da chattar en Surselva in trenader per in’equipa da 3. ligia», constatescha Donat Albin.

Donat Albin e Philippe Vincenz avevan surpiglià communablamain il post da trenader tar l’emprima equipa dal CB Trun/Rabius la stad 2019. L'ultima stagiun ha l'equipa terminà il campiunadi da 3. liga sin ina plazza amez la tabella.

RTR novitads 16:00

Artitgels legids il pli savens

Scrollar a sanestra Scrollar a dretga