Siglir tar il cuntegn

Header

Skiunz svizzer.
Legenda: Mauro Caviezel è sportist grischun da l'onn 2020. Keystone
cuntegn

Notg dal sport grischun 2020 Mauro Caviezel è sportist grischun da l'onn

Il skiunz da la Tumleastga è vegnì onurà ier saira a Malans da l'Associaziun grischuna da sport cun in schec da 10'000 francs. Elegì Mauro Caviezel han per ina in voting dal public e per l'autra ina giuria d'experts.

En la cuppa mundiala da skis n'è Mauro Caviezel anc mai stà sisum il podest, ma tar l’elecziun da sportist grischun da l'onn ha el questa giada laschà l’entira concurrenza davos el. Caviezel ha survegnì las bleras vuschs e gudagnà quell’elecziun avant Giulia Tanno ord la scena da freeski e la biatleta Selina Gasparin.

Ferma stagiun 2019/2020

Mauro Caviezel ha merità quest titel grazia a sia bunas prestaziuns la stagiun passada. Tranter auter ha el gudagnà la culla da cristal sco meglier skiunz en la disciplina super-G. Tut en tut è il skiunz da 31 onns stà la stagiun passada tschintg giadas sin in podest da la cuppa mundiala.

Sco sportist grischun da l'onn vegn Mauro Caviezel uss sin ina glista cun nums sco Dario Cologna, Carlo Janka, Nino Niederrreiter u er in Nevin Galmarini ch’èn tuts gia daventads sportist grischun da l'onn. Avant in onn aveva Arno Lietha che fa cursas cun skis da turas gudagnà quest titel.

RTR novitads 06:00

Artitgels legids il pli savens

Scrollar a sanestra Scrollar a dretga