Suenter divers onns sco defensur sin il glatsch tar ils clubs da la 1. liga EHC Winterthur, EHC Wettingen ed EHC Schaffhausen, ha Christian Modes cumenzà sia carriera sco trenader. Sco ultim era el trenader principal tar l'EHC Wetzikon en la 1. liga. Sco il club grischun scriva en sia communicaziun, hajan ins pudì sa cunvegnir cun l'EHC Wetzikon uschia che Christian Modes stettia per immediat a disposiziun per sia nova funcziun. Tenor Modes saja l'EHC Arosa per el ina bella sfida tar in grondius club da tradiziun.
Envers RTR ha Peter Röthlisberger dal cussegl d'administraziun da l'EHC Arosa manegià, che Modes saja fitg engaschà. E las finamiras dal club restan era cun il nov mainafatschenta autas.
A partir dal cumenzament da l'onn ha il club grischun gia engaschà Livio Rutz sco collavuratur administrativ. El sustegnia il nov mainafatschenta, hai num en la communicaziun.
