Siglir tar il cuntegn

Header

audio
Intervista cun Dario Cologna en vista a la stagiun 2020/2021.
Or da Actualitad dals 25.11.2020.
laschar ir. Durada: 4 minutas 6 Secundas.
cuntegn

Passlung Cologna: «Prender di per di e far il meglier pussibel»

Dario Cologna è pront per la nova stagiun da passlung, che cumenza a Ruka en la regiun da Kuusamo en Finlanda. La stagiun 2020/2021 stat sut l’ensaina da corona. Sche tut las cursas pon vegnir manadas atras sco planisadas, stat anc scrit en las stailas.

Prender di per di e far il meglier pussibel, quai la devisa da Dario Cologna che parta en sia 15avla stagiun da la cuppa mundiala. El vegnia a sa proteger uschè bain sco mo pussibel dal coronavirus, ma el saja er disà da far quai sco sportist. Far quitads e memia bler patratgs na portia percunter nagut.

La finamira è adina da gudagnar ina medaglia

En la nova stagiun spetga bain in u l'auter punct culminant. L’emprim datti schon mez december cun las cursas da chasa a Tavau. Dals 1 fin ils 10 da schaner 2021 spetga il Tour de Ski, che cumenza en la Val Müstair, la patria da Dario Cologna. Il punct culminant è lura dentant il campiunadi mundial ad Oberstdorf en Germania. Là vul il Jauer gudagnar in’ulteriura medaglia. D’ina ulteriura medaglia siemia Dario Cologna er schon en vista als proxims gieus olimpics il 2022 a Peking. Quatter medaglias olimpicas dad aur ha il passlunghist da 34 onns gia en ses palmarès. Ed er sche Cologna è arrivà en l’atun da sia carriera, il mument na fa el nagins patratgs da chalar cun il sport da passlung, er sch’el sa legria sin quai che suonda lura suenter sia carriera.

Actualitad 17:00

Artitgels legids il pli savens