Siglir tar il cuntegn

Header

cuntegn

Passlung Ilya Chernousov gudogna il Planoiras 2020

Il Russ Ilya Chernousov gudogna la 35avla ediziun da la cursa populara da passlung Planoiras a Lai. L’um da la biatleta Selina Gasparin triumfescha sco gia l'onn passà. Per ils 25 kilometers da Lantsch fin a Parpan ed enavos a Lai ha el duvrà strusch 56 minutas - in nov record.

Ilya Chernousov ch'abitescha dapi intgins onns a Lantsch ha battì en in sprint final Marino Capelli da Tavau. Cumplettà il podest sco terz ha il Sursilvan Toni Livers che veva gudagnà questa cursa a Lai il 2012. Avant in onn era Livers vegnì segund davos Chernousov.

Mussà ina buna prestaziun ha tranter auter er il campiun da mountainbike Nino Schurter. El ha pers strusch quatter minutas sin il victur Ilya Chernousov ed è uschia vegnì 15avel. Ses punct culminant suonda lura la stad. A Tokio en il Giapun vul Schurter defender ses titel da campiun olimpic en la cursa da cross country.

Clera victura tar las dunnas

Tar las dunnas hai dà ina surpraisa cun Seraina Kaufmann. La giuvna curridra da Ftan ha triumfà avant la victura da l'onn passà, Seraina Boner da Tavau. Kaufmann è stada bunamain duas minutas pli sperta che la dunna da Toni Livers ed ha uschia gudagnà per l'emprima giada la cursa Planoiras. Terza è vegnida la Tudestga Sigrid Mutscheller.

La cursa curta, il Planoirino sur 12,5 kilometers, han gudagnà Andreas Durrer da Vilters tar ils umens ed Ilaria Gruber da Silvaplauna tar las dunnas.

Relaziuns da siemi

Tut en tut èn stads a la partenza radund 460 curridras e curriders, quai tar relaziuns perfetgas. Tschiel blau, bler sulegl, bunas temperaturas ed ina loipa sperta han procurà che l'ediziun da giubileum, 35 onns Planoiras, resta a tut ils participants en buna memoria.

RTR novitads 14:00