Siglir tar il cuntegn

Header

video
Toni Livers sa retira sco passlunghist professiunal
Or da Telesguard dals 14.04.2020.
laschar ir
cuntegn

Passlung Toni Livers di grazia ed adia

Cun 36 onns e suenter bun dus decennis sa retira Toni Livers dal sport da prestaziun. Cun l’atlet oriund da Trun terminescha uschia ina da las grondas figuras svizras da passlung sia carriera.

I na saja betg stà ina decisiun d’in di sin l’auter, el haja propi fatg lungas ponderaziuns co vinavant, mo i saja uss franc il dretg mument da dir adia, uschia Toni Livers. La raschun per questa decisiun haja plirs motivs. Per ina n’haja el betg pudì far grond progress ils davos dus onns ed uschia haja el er adina dastgà partir pli e pli pauc a cursas da la cuppa mundiala, e per l’autra saja er la situaziun a chasa sa midada il davos temp. Toni Livers è maridà cun Seraina Boner ed è dapi l’onn passà bab d’in buob cun il num Leo.

Jau hai gì ina fitg bella carriera, ina lunga carriera, ma uss èsi temp da far quest pass, er sche jau fatsch vess.
Autur: Toni Liverspasslunghist

La fin da la carriera aveva Toni Livers dentant mess avant in zic auter. El haja adina gì il siemi da chalar sia carriera professiunala cun in titel da campiun svizzer sur la distanza roiala da 50 kilometers. Pervia dal coronavirus n’hai dentant dà nagin campiunadi svizzer quest onn. Uschia n’haja el er betg pudì prender cumià endretg da ses collegas d’equipa e l’entira famiglia da passlung. Cun tscherts amis è Toni Livers stà passa 15 onns en il cader.

Pli lunsch e pli gugent

Toni Livers valeva sco in spezialist en il stil liber e sur las distanzas lungas. Gia da junior il 2003 avev’el cuntanschì il quart plaz al campiunadi mundial en Svezia sur la distanza da 30 kilometers. Las cursas da distanza èn però adina vegnidas pli e pli raras en la cuppa mundiala. Uschia è Toni Livers er adina puspè stà a la partenza a cursas da la seria Worldloppet sco il Wasalauf en Svezia u il Birkebeiner en la Norvegia, duas cursas popularas che valan sco ils pli gronds classichers da passlung sur distanzas extremas. In’autra fermezza da Toni Livers è adina stà il morder, er cura che las forzas eran a fin. En quests mument ha il chau adina giugà ina gronda rolla, e mental è Toni Livers stà in dals ferms passlunghists insumma.

Punct culminant avant chasa

En sia carriera ha Toni Livers gudagnà duas cursas da la cuppa mundiala. Il pli grond success ha el festivà a Tavau. Il 2007 ha el gudagnà al pe dal Flüela la cursa sur 15 kilometers en il stil liber, quai ensemen cun il Franzos Vincent Vittoz. Il december 2010 ha Livers triumfà cun la staffetta svizra en la cursa sur 4 giadas 10 kilometers a La Clusaz en Frantscha, in success istoric per il quartet cun Livers ensemen cun ses collegas Dario Cologna, Remo Fischer e Curdin Perl. A campiunadis svizzers ha Toni Livers gudagnà 27 medaglias, 15 dad aur.

video
Toni Livers gudogna cursa da 15 km a Tavau 2007
Or da sportaktuell dals 03.02.2007.
laschar ir

4 gieus olimpics ed 8 campiunadis mundials

Toni Livers ha er preschentà ils davos 15 onns la Svizra a blers eveniments gronds. Quatter giadas è il currider rumantsch sa participà a gieus olimpics, il 2006 a Turin, il 2010 a Vancouver, il 2014 a Sotschi ed il 2018 a Pyeongchang. En memoria stat principal il 12avel plaz en la cursa sur 15 kilometers stil liber a Vancouver en il Canada.

Toni Livers
Legenda: Il bab da famiglia resta fidaivel al sport da passlung, quai sco trenader. Keystone

Ses emprim campiunadi mundial cun l’elita è stà il 2005 ad Oberstdorf en Germania, lura veva Toni Livers 22 onns. Silsuenter ès el sa participà en in ciclus da mintgamai dus onns a Sapporo, Liberec, Oslo, Val di Fiemme, Falun, Lahti ed avant in onn a Seefeld en il Tirol. Loschs saja el oravant tut dal 15avel plaz al campiunadi mundial il 2015 a Falun en Svezia. Quai saja stà ina greva stagiun, mo gest al punct culminant da la stagiun haja el pudì mussar sia meglra cursa. Falun restia perquai ad el adina en buna memoria.

video
staffetta svizra gudogna il 2010 a La Clusaz sur 4 x 10 km
Or da sportpanorama dals 19.12.2010.
laschar ir

Da l’atlet al trenader

Toni Livers sa legra uss sin ina proxima part da la vita, principalmain er da passentar dapli temp cun sia famiglia. El vul dentant er star fidaivel al sport da passlung. Uss sa legra Livers da sa scolar sco trenader da passlung per lura er dar vinavant sia savida a giuvens talents. A la partenza vegn’ins a vesair il sportist da 36 onns vinavant a las cursas popularas sco il maraton da l’Engiadina, il maraton da la Surselva u il Planoiras a Lai.

RTR novitads 12:00

Artitgels legids il pli savens

Ir a sanester Ir a dretg