Il Cdh Engiadina è partì cun blera fidanza en sasez en il segund gieu da playoff encunter Küssnacht. Durant l’emprima partida è l’equipa da l’Engiadina Bassa vegnida sut las rodas. Il tempo e l’intensitad da l’adversari ha surdumandà il Cdh Engiadina. En il segund gieu a chasa vuleva l’equipa grischuna far meglier. Durant l’emprim terz è quai puspè gartegià. En il segund terz ha la squadra alura dentant dà or da maun il gieu. E malgrà tut ils sforz durant las davosas 20 minutas n’è era betg pli gartegià al Cdh Engiadina da cumpensar il retard. La squadra ha dentant tuttina mussà ina buna stagiun. Cun plazza sis suenter la qualificaziun e cun pudair dar partidas da playoff è ins cuntent a Scuol.
San Murezzan na ha betg nizzegia il puck da matsch
L’emprim gieu da la seria da playoff encunter Pregassona ha San Murezzan dominà. Fin tar la mesadad da la partida manava l’equipa da l’Engiadina Auta gia cun 5:0 cunter Pragassona. Alura ha San Murezzan quasi terminà da dar hockey ed uschia laschà vegnir Pregassona anc en il gieu. Quai vulev’ins en mintga cas evitar en il segund gieu. E quasi il medem è puspè capità. Fin en la mesadad da la partida manava San Murezzan puspè cun 4:1. Ed er questa giada ha l’equipa engiadinaisa puspè laschà vegnir Pregassona en il gieu. La fin finala è la decisiun a favur da Pregassona crudada en la prolungaziun. En la seria statti uss pari 1:1.
E pari statti era en la seria tranter Lai Valbella e Sursee. L’equipa dal Grischun central ha mussà ina reacziun sin l’emprima sconfitta ed ha gudagnà il segund duel cun 3:1. En questas dus serias vegni il venderdi saira ad in terz gieu decisiv.
