En la seria da mezfinal dals playoffs ha il club da tradiziun dal Scanfetg er pers il terz gieu cunter Martigny, questa giada a chasa e quai cler e net cun 1:5.
Gia suenter l'emprim terz manavan ils Vallesans cun 2:0 e curt suenter ch'il segund terz ha cumenzà hani sajettà il terz gol.
Malgrà ch'Arosa avess anc gì avunda temp per volver il gieu, èsi sulettamain reussì da sajettar il gol d'onur 3 minutas avant la fin. Ma suenter ha Martigny anc sajettà 2 ulterius gols. Martigny ha gudagnà la seria cun 3:0
La secunda partida
La sonda saira ha l'EHC Arosa pers la segunda partida en la seria dal mezfinal, cunter il club vallesan il HCV Martigny cun 2:3 suenter prolungaziun. Per evitar che la stagiun è a fin anticipadamain, sto Arosa gudagnar l'auter mardi a chasa.
Cumenzà ha la partida ordaifer cunter Martigny bain, en la 4. minuta ha Arosa sajettà l'emprim gol tras Patrick Bandiera. En la 13avla minuta han ils Vallesans dentant pudì egualisar, e curt suenter l'emprima pausa èn ils indigens ids en avantatg. Al giugader d'Arosa Hassan Krayem èsi lura gartegià d'egualisar al 2:2 en la 36avla. minuta.
Damai ch'i n'ha dà nagins gols en il davos terz, suonda la prolungaziun. E là fan ils da Martigny il gol decisiv al 3:2, ed èn uschia en avantatg en la seria cun 2:0.
Per cumenzar pers a chasa
L'emprima partida dal mezfinal a chasa ha l'EHC Arosa pers. L'emprim terz n'hai dà nagins gols, en il segund terz gartegian ils da Martigny lura duas giadas. Arosa vegn anc da scursanir en la 50avla minuta, al 1:2. Quai resta dentant il resultat final, era sche Arosa ha anc prendì or dal gieu ses goli en las davosas minutas.
Il proxim duel cunter Martigny ha Arosa il mardi saira a chasa.
Playoffs MyHockey League
Arosa batta Seewen en il quartfinal
L'EHC Arosa ha era gudagnà la terza partida dals quartfinals cunter Seewen, quai cun 6:1. La fin dal segund terz è Arosa ì l'emprima giada en avantatg. E fin la 51avla minuta èsi gartegià d'auzar il resultat sin 4:1. Ils dus davos gols èn lura crudads en las davosas minutas da la partida. Cun questa victoria la gievgia saira gudogna Arosa la seria best of 5 cun 3:0.
L'emprima partida da la seria cunter Seewen avevan ils Grischuns gudagnà cun 3:2, il gol decisiv era pir crudà en il davos terz da la partida. La segunda partida ordaifer tar Seewen è lura ida a fin cun in 6:4 en favur da Arosa. Là era la decisiun crudada en il segund terz, cura ch'ils Grischuns avevan marcà trais gols.
Cuira è out
Main bain èn il quartfinals ids per l'EHC Cuira cunter Huttwil. Il club da la chapitala perda la seria cun 1:3. La stagiun è uschia finida per l'EHC Cuira.
L'emprima partida dal quartfinal cunter Huttwil han ils da Cuira pers cun 2:3 suenter prolungaziun. Suenter in victoria da 5:4 ordaifer èn suandadas duas ulteriuras terradas. Ina cun 1:5 e l'ultima partida cun 1:4.
La situaziun avant il playoffs
Anc mai dapi che la terz auta liga da hockey svizra la MyHockey League è vegnida fundada, èn las duas equipas grischunas stadas uschè fermas. Il EHC Cuira ed il EHC Arosa han fatg furora durant la qualificaziun. Omaduas equipas grischunas eran quasi davent da l’entschatta a la testa da la tabella. Pervi da quai èn las aspectativas en ils playoffs uss grondas.
La voluntad e la veglia da dar hockey è il pli impurtant.
Ils playoffs èn per ils giugaders da hockey il pli bel temp da l’entira stagiun. Cler ch'ins metta la basa per ina buna fasa finala dal campiunadi gia durant la qualificaziun. Cun buns resultats pon ins sa rangar en la part sura da la tabella, ed ha uschia sco Cuira ed Arosa questa stagiun adina l’avantatg da chasa en ils playoffs. Propi serius vegn quai dentant uss. Inqual di perfin, che las cartas vegnan uss maschadadas da nov.
Igl è da cumbatter mintga giada ch'ins è sin il glatsch.
