Ils emprims pass sin il glatsch ha Tiziano Compagnoni fatg tar il HC Poschiavo. En sia patria ha el cumenzà cun il sport da hockey. Pli tard ha el giugà tar l’equipa sut 17 onns dal EHC Cuira ed era en l’equipa sut 20 onns da Lai Valbella.
Enavos a Poschiavo ha el fatg il pass cun l’agen club da hockey en il hockey dals creschids. Las emprimas stagiuns ha el dà en la terza liga cun Poschiavo. Durant quel temp è alura er vegnì la dumonda dal trenader dal CDH Engiadina Benny Wunderer, sch’el avess interess da dar er en segunda liga cun il CDH Engiadina.
HC Poschiavo e CDH Engiadina il medem mument
Durant il settember e l'october dat Tiziano Compagnoni dapli gieus cun il CDH Engiadina. A partir da november cumenza alura er il campiunadi en terza liga ed il hockeyan da 24 onns gioga damain per Engiadina e dapli per il HC Poschiavo.
Suenter la dumonda dad Engiadina n’ha jau pensà: lascha pruvar.
Uschia po el dar durant ils mais da la stagiun da hockey per omaduas equipas. Per pudair dar en duas equipas dovri bler talent d’organisaziun. Quai ha Tiziano Compagnoni. El abita e studegia a Rapperswil e turna per ils trenaments adina a Poschiavo ni en Engiadina. Sche sias equipas dattan dentant in gieu ord chasa, saja quai pli simpel cun far il viadi. Proximamain il giugader cun la rolla dubla puspè il viadi en Engiadina, quai per giugar per il CDH Engiadina il derby cunter ils rivals da l'Engiadin'Ota.
