Cun brama han ils giugader dal CDH Engiadina spetgà il segund derby da la stagiun encunter il EHC San Murezzan. Mez october aveva il CDH numnadamain pers l’emprim duel da derby cleramain cun 1:6 encunter San Murezzan. Uschia eran ils giugaders da l’equipa da l’Engiadina Bassa pronts da prender revantscha. E quella gida èsi grategià.
Entir gieu e highlights commentads da Roman Dobler ed Andri Casty
Puspè ha l'EHC San Murezzan empruvà da prender il derby cunter il CDH Engiadina enta maun. Al cumenzament dals terzs è San Murezzan mintgamai vegnì cun bler tempo e cun meglras acziuns or da la gardaroba. Questa giada n'è quai dentant betg grategià a San Murezzan da marcar gols. Ed uschia è capità quai che capita savens en ina partida da hockey. Sch'ins na fa betg ils gols alura as survegna els. Il CDH Engiadina è ì en avantatg encunter San Murezzan en la 30avla minuta. San Murezzan ha dentant be quatter minutas suenter egualisà il gieu.
Decisiun en l'ultim terz
Era suenter 40 minutas era il gieu anc adina egualisà. Sandro Ritzmann dal CDH Engiadina ha alura dentant procurà 10 minutas avant la fin per il 2:1. San Murezzan ha bain empruvà da reagir anc ina giada. L’ultim anc cun prender il goli or dal gol e trametter enstagl in sisavel giugader sin il glatsch. Empè da profitar da quai ha Engiadina gudagnà il davos bully e silsuenter fatg anc il 3:1 en il gol vid.
Las intervistas
Suenter trais terradas en seria ha il CDH Engiadina uschia pudì festivar sia emprima victoria en il derby dapi stgars dus onns. Quai fa bain, di il capitani dal CDH Engiadina, Dario Schmidt. Ina victoria da derby dettia schlantsch per la cuntinuaziun dal campiunadi e quest schlantsch sa il CDH Engiadina segira duvrar.
Bunas olmas enturn las plazzas da glatsch
Per ch'il manaschi sin e sper la plazza da glatsch funcziunescha senza incaps dovri differentas persunas che s'engaschan e sa gidan. Duas dad ellas èn Anita Pozzoli dal CDH Engiadina e Nicole Lony dal EHC San Murezzan.
Sch'i ha num derby engiadinas vegnan mintgamai schurmas aspectaturas ed aspectaturs a l'ur da glatsch. In gieu da derby saja finanzialmain in toc pli attractiv che sche l'adversari vegn da la Bassa. Quai conferman las entradas en las cassas dal restaurant sco er quella da l'entrada dal stadion da glatsch.
Uschia che betg mo ils fan da hockey sa legran d'in gieu plain tensiun sch'i va per batter l'adversari ch'è il vischin engiadinais mabain er il club sco er il possessur dal restaurant che genereschan la saira da derby mintgamai in zic dapli entradas ch'autras sairas da hockey.
Qua il «Telegram» dal gieu
Themen in diesem Liveticker
- Il CDH Engiadina ha pia pudì realisar sia revanscha cun 3:1
- 17 secundas avant la fin 3:1 per il CDH
- Sandro Ritzmann sajetta en avantatg il CDH
- Il terz terz fin ussa senza marcar gols
- San Murezzan egualisescha al 1:1
- En il segund terz – l'emprim gol
- Ils highlights da l'emprim terz en revista critica
- EHC San Murezzan c. CDH Engiadina
- Per ils giugaders hai gia cumenzà
- Mo anc enfin las 20:00 – noss gieu da tippar
Il derby ha occupà: Tgenina da las duas equipas da hockey engiadinaisas è la pli ferma. 54% han gì in bun nas...
Quiz al radio – tgi sa dapli
Las vuschs avant il derby: in trenader noviz – ed ina veglia vulp
Ina giada ha il nov trenader da l’EHC San Murezzan, Andreas Schneeberger gia manà si'equipa en in derby engiadinais – e gudagnà quel. Uss suonda il segund duel da las duas equipas engiadinaisas da la 2. liga. Ad Andreas Schneeberger plascha fitg tut quai che gira enturn il derby.
Per il trenader dal CDH Engiadina Benny Wunderer èsi impurtant gia en ils trenaments avant il derby, da procurar ch’ils giugaders na van la finala betg surmotivads en la partida. I dovria la ballantscha tranter l'energia buna e positiva, cura che l’equipa procuria per dapli u damain tensiun en il gieu.
Inscunter da giugaders che s’enconuschan
Il mund en Engiadina è pitschen ed uschia er il mund da hockey. Ils giugaders da l'EHC San Murezzan sco era ils protagonists dal CDH Engiadina enconuschan in l’auter. Perquai san ins era magari precis sco che l’adversari vegn a giugar. Grondas surpraisas tranter San Murezzan ed Engiadina na vegni betg a dar.
Impressiuns dal derby engiadinais
-
Bild 1 von 4. Hockey sut tschiel avert a San Murezzan. Bildquelle: RTR.
-
Bild 2 von 4. Hockey ora en il liber a San Murezzan. Bildquelle: RTR.
-
Bild 3 von 4. Pront per il proxim «shift». Bildquelle: RTR.
-
Bild 4 von 4. Giugaders dal CDH Engiadina. Bildquelle: RTR.
E tuttina, era sch'ils giugaders enconuschan in l'auter, sch'ils visiers vegnan montads e sche l’emprim puck vegn bittà en il gieu, lura èn els adversaris. I vegn cumbattì mer mintga puck e per mintga schanza. Cun il tun da partenza en il gieu da derby guardan ins be pli sin l’atgna equipa e sin la victoria. Ed uschia er sin il titel dal retg da hockey en Engiadina.
San Murezzan cun in nov trenader
Suenter divers onns cun Alexander Aufderklamm sco trenader da l’emprima equipa ha il EHC San Murezzan decidì da vulair in midament. Aufderklamm resta dentant fidaivel a sia equipa e s’occupa da la partiziun da juniors da San Murezzan.
Sco nov trenader per l’emprima equipa ha San Murezzan pudì engaschar Andreas «Chutz» Schneeberger. Il nov trenader è oriundamain dad Olten. El sez ha dà hockey tar Olten, Bienna ed Ajoie en liga naziunala A e B. Suenter sia carriera activa era Andreas Schneeberger engaschà en diversas partiziuns da juniors, il davos sco schef trenader da l’equipa sut 20 onns dal EHC Basilea.
Schneeberger stat per ina clera filosofia da gieu, el vul promover la lavur da team e giuvens talents. Valurs ch'èn da gronda impurtanza per l'EHC San Murezzan.
Sper Andreas Schneeberger che lavura per l’emprima giada en Engiadina ha San Murezzan engaschà anc in vegl enconuschent. Sco trenader assistent è Gian Marco Trivella turnà tar sia equipa da tschep. Trivella ha giugà passa 20 onns tar l'EHC San Murezzan. Suenter sia carriera activa è el stà trenader tar San Murezzan. E suenter ina pausa è el uss puspè enavos tar sia equipa dal cor.
Engiadina cun equipa fitg giuvna
Il contingent da giugaders da hockey en Engiadina è fitg limità pervia da la situaziun perifera, dentant era pervia da scolaziun, u er perquai ch'ins lavura ordaifer. Vitiers vegn la situaziun finanziala che na lubescha betg d'engaschar giugaders che vegnan natiers. Uschia ston omaduas equipas lavurar cun il material da giugaders ch'è avant maun.
Giugaders giuvens vegnan uschia gia baud integrads en las emprimas equipas. Il CDH Engiadina ha per exempel dà la stagiun passada la schanza a giuvens giugaders da be 16 onns da far lur emprimas experientschas en l’emprima equipa. E quai na vegn durant la proxima stagiun betg ad esser auter.
En l’emprima equipa vegnan ils giuvens giugaders avischinads al hockey dals creschids. Il medem mument dattan quels giugaders er en las equipas da juniors. Dapi onns han quels giugaders da dumagnar ina chargia dubla. Impurtant en quella situaziun è adina ch'ins na surchargia betg il pensum dals giuvens giugaders.
La statistica pleda ina clera lingua
Ils ultims 10 onns hai dà 15 derbys da hockey engiadinais. Da quels 15 derbys ha il EHC San Murezzan gudagnà 11. Il CDH Engiadina ha pudì decider be quatter gieus a sia favur.
La stagiun passada ha il EHC San Murezzan gist gudagnà omadus derbys. Las stagiuns avant eran pli egualisadas. La curuna da hockey midava da l’Engiadin'Ota en Engiadina Bassa e puspè enavos.
Statistica derbys engiadinais
| 26-11-16 | CDH Engiadina – EHC San Murezzan (2:4) |
| 11-02-17 | EHC San Murezzan – CDH Engiadina (6:5 OT) |
| 25-11-17 | CDH Engiadina – EHC San Murezzan (2:4) |
| 10-02-18 | EHC San Murezzan – CDH Engiadina (5:2) |
| 30-10-18 | EHC San Murezzan – CDH Engiadina (8:5) |
| 28-11-18 | CDH Engiadina – EHC San Murezzan (4:3) |
| 21-09-19 | CDH Engiadina – EHC San Murezzan (0:3) |
| 26-11-19 | EHC San Murezzan – CDH Engiadina (3:2) |
| 2020/2021 | nagins derbys pervia da corona |
| 17-11-21 | CDH Engiadina – EHC San Murezzan (7:3) |
| 12-10-22 | EHC San Murezzan – CDH Engiadina (10:7) |
| 30-11-22 | CDH Engiadina – EHC San Murezzan (4:3) |
| 25-10-23 | EHC San Murezzan – CDH Engiadina (5:0) |
| 10-01-24 | CDH Engiadina – EHC San Murezzan (3:1) |
| 05-10-24 | EHC San Murezzan – CDH Engiadina (4:3 OT) |
| 11-12-24 | CDH Engiadina – EHC San Murezzan (3:4) |
| 22-10-2025 | CDH Engiadina – EHC San Murezzan (1:6) |
Finamiras da la stagiun: mezfinal ed anc ina giada uschè bun
Durant las davosas stagiuns è il campiunadi gia stà a fin per l'EHC San Murezzan il favrer. L’equipa da l’Engiadi'Ota è adina gia crudada or en l’emprima runda dals playoffs. Il cumbat per ina buna plazza è pia gia stà a fin. Perquai è la finamira da questa stagiun clera: l’equipa vul puspè ina giada far il proxim pass e sa qualifitgar per il mezfinal. La davosa giada è quai reussì avant 10 onns.
Il CDH Engiadina va cun la fiduzia en la stagiun dad avair mussà l’enviern passà la meglra stagiun insumma. Per l’emprima giada en l’istorgia da l’equipa è il CDH Engiadina avanzà fin en il mezfinal. Quai n'era avant anc mai gartegià a l’equipa da l’Engiadina Bassa. Cler che la squadra vul anc ina giada passentar quels sentiments. Per che la conferma da la stagiun passada reusseschia dovri dentant ina massa. La finamira principala dal CDH Engiadina è dad insumma esser da la partida en ils playoffs.