Omadus fragliuns Bosshard èn ids en la disciplina «lead», ils resultats èn dentant differents. Celina, ch'ha 21 onns, ha cuntanschì stgars il quart plaz e manchentà il podest be per paucas secundas.
Benjamin, 23 onns, ha suenter ina ferma prerunda fatg in sbagl en il mezfinal, uschia è il siemi d'in plaz sin il podest stà pers gia suenter paucas secundas. Benjamin ha grondas ambiziuns e guarda cun optimissem envers la proxima stagiun, nua ch'el vul danovamain sa fatschentar cun la reabilitaziun sco campiun d'Europa e sco victur da la cuppa mundiala en la disciplina «lead».
La preparaziun per la nova stagiun è dentant stada marcada da sfidas, cunzunt suenter ina blessura cun il parasgol, ch'ha sfurzà el da sa fatschentar pli fitg cun la reabilitaziun che cun il trenament.
Ils fragliuns sustegnan in l'auter e partan tant ils auts sco ils bass da lur carriera sportiva. Celina festivescha ses meglier plaz en ina cuppa mundiala, entant che Benjamin sa metta en viadi enavos vers l'elita mundiala.
Avant Saas-Fee: Benjamin Bosshard è in dals megliers
La stagiun passada n'è nagin stà uschè bun da raiver sin glatsch sco Benjamin Bosshard da la Lumnezia. Cun gudagnar la cuppa mundiala ed il campiunadi europeic, va in siemi en vigur per il giuven da 23 onns.
La stagiun passada è propi stada brutal buna.
Quest success ha el pudì realisar en la disciplina da «lead». En quella disciplina sto l'atlet u l'atleta raiver uschè aut d'ina paraid si sco pussaivel, e quai cun charpellas vi dals chalzers e pichels enta maun.
La paraid na consista dentant betg da glatsch, mabain da lain. Mo in pèr elements èn da glatsch. Uschia pon ins garantir che tuts e tuttas pon raiver il medem grad da difficultad. Sin glatsch natiral na fiss quai dentant betg pussaivel.
La stagiun passada n'ha betg mo Benjamin Bosshard festivà success. Era tar las dunnas ha ina Grischuna gudagnà la cuppa mundiala en la disciplina «lead». Sina Goetz ha fatg en tut 400 puncts, e cunquai 108 puncts dapli che la segunda, Woonseon Shin, da la Corea dal Sid. La dunna da 26, oriunda da Mastrils, ha gudagnà 4 da 5 concurrenzas da la cuppa mundiala.
Plinavant è ella campiunessa europeica (2025), e vice-campiunessa mundiala (2024).
Per avair quest success investescha Benjamin Bosshard bleras uras en il fitness e vi da la paraid. Pervia d'in accident ch'il Sursilvan ha gì a l'entschatta d'avust 2025 è la preparaziun la stad passada vegnida fitg a curta. Enstagl da trenar cun charpellas e pichels ha el stuì sa dar giu durant trais mais cun crutschas.
D'in di sin l'auter na vegn ins betg pli d'ir a pe, bleras chaussas na van simplamain betg pli. Ir cun in café da la cuschina tar la maisa, quai na va tuttenina betg pli.
In mund è dà ensemen cura che Benjamin Bosshard ha realisà quant grev che ses accident è stà. Tuttina ha el empruvà da far tut il pussaivel d'esser semtgà per las concurrenzas che stattan ussa davant porta.
Jau smin che la concurrenza n'ha betg fatg uschè pauc sco jau hai fatg.
Il Lumnezian è dentant era pertschert che la concurrenza ha gì ina meglra e segir pli lunga preparaziun ch'el. En la Corea dal Sid, nua che l'emprima concurrenza mundiala da questa stagiun ha lieu, vul Benjamin Bosshard guardar en tge furma ch'el sa chatta. Cler è ch'il giuven da 23 onns ha tut quai ch'i dovra da danovamain gudagnar la cuppa mundiala.
