Per Nina Zoller da Cuira ch'abita dentant a Mustér èsi gia la quarta victoria tar la quarta ediziun dal Rheinquelle-Trail. Ella ha distanzià l'entira concurrenza da las dunnas. La segunda, Iryna Raichuk da l'Ucraina, ha gia pers passa 38 minutas. Cumplettà il podest sco terzas han communablamain Lea Tauern e Martina Augsburger dal Principadi dal Liechtenstein (+44:34 minutas).
Rangaziuns Rheinquelle-Trail 2023
Tar ils umens ha Manuele Polli triumfà tar sia premiera a questa cursa sisum la Surselva. Il giuven spezialist da maratons sin via ch'ha pir dacurt festivà ses 25avel anniversari ha la finala gudagnà la cursa cun in avantatg da 7:25 minutas sin Eligius Tambornino da Trun. Er l'anteriur profi da passlung e biatlon è stà per l'emprima giada a la partenza al Rheinquelle-Trail. Terz è vegni Manuel Sprenger da Turitg (+14:25 minutas).
La cursa curta, il Tgom-Trail sur la distanza da 18 kilometers, ha gudagnà tar las dunnas Sabrina Degonda da Rabius e tar ils umens Stephan Wenk dal chantun Turitg.
Per la quarta giada sur pizs e pitgognas
A Sedrun spetga il quart maraton da Trail che maina l'emprim sin il Tgom, lura sur il Piz Cavradi al Lai da Toma, vinavant sin il Piz Pazzola e sur il Pass Alpsu puspè enavos a Sedrun, quai sur la distanza da 42,2 kilometers cun 3'000 meters differenza d'autezza.
Rheinquelle-Trail 2023
Tut en van la sonda a bunura bun 230 curridras e curriders a la partenza al Rheinquell-Trail. Pass 100 curridras e curriders sa participescha a la cursa roiala sur la distanza da maraton da 42,2 kilometers.
Bun 120 curridras e curriders curan la cursa curta, il Tgom-Trail, che maina suenter il Tgom enavos a Sedrun sur ina distanza da 18 kilometers. La partenza per il Rheinquelle-Trail è a las 08:00 uras, quella dal Tgom-Trail a las 09:00 uras.
Wenk e Zoller partan sco favurits
A la partenza van gist trais commembers da l’equipa naziunala ch’han dacurt persvadì al campiunadi mundial da trail-running ad Innsbruck en l’Austria. Ed er sche quest trio cun Nina Zoller da Cuira, Stephan Wenk e Raphael Sprenger vesan la cursa sisum la Surselva sco in test u trenament audan els trais tar ils gronds favurits. Stephan Wenk ha gia gudagnà a Sedrun tant il Rheinquelle-Trail sco era il Tgom-Trail. Sco preparaziun sin il «Eiger Ultra Trail» parta il Turitgais quest onn be a la cursa curta. Il medem plan ha er Raphael Sprenger dal chantun Turitg ch’era vegnì quart tar la premiera dal Rheinquell-Trail.
Sur la distanza lunga curra però Nina Zoller ch’ha dacurt gudagnà cun l’equipa svizra argient al campiunadi mundial en l’Austria. La sportista grischuna ha triumfà a tut las cursas dal Rheinquelle-Trail en la categoria da las dunnas.
